Կայացավ ամերիկահայ մշակութաբան Ալիս Նավասարգյանի գրքի շնորհանդեսը

Նոյեմբերի 20-ին ՀՀ սփյուռքի նախարար Հրանուշ Հակոբյանը մասնակցեց ամերիկահայ գրող, մշակութաբան Ալիս Նավասարգյանի «Անմահներ. նկարազարդ մի ժողովածու՝ Հայաստանի, հայերի և իրանահայերի մասին» խորագրով գրքի շնորհանդեսին, որին ներկա էին նաև գրական աշխարհի ներկայացուցիչներ:

Իրանի Թավրիզ քաղաքում ծնված Ա.Նավասարգյանի ընտանիքում մշտապես իշխել են հայկական ավանդույթներն ու մշակույթը, ինչը նշանակալի դերակատարություն է ունեցել նրա հետագա գործունեության ընտրության հարցում: Ալիսը երաժշտություն և մշակույթի պատմություն է ուսանել Թավրիզում, Սպահանի Համալսարանում ստացել Հայագիտության և պատմության բակալավրի աստիճան, հհրատարակել է «Իրան-Հայաստան. Ոսկի կամուրջներ», «Բեմին նվիրված հայուհիներ» գրքերը:

«Անմահներ. նկարազարդ մի ժողովածու՝ Հայաստանի, հայերի և իրանահայերի մասին» գրքում ներկայացված է հայ ժողովրդի դարավոր պատմությունը՝ արվեստը, ծեսերը, հեքիաթները, լեգենդներն ու հավատալիքները, նշանավոր պատմական հերոսներն ու գործիչները:

Ողջունելով Ա. Նավասարգյանին' ՀՀ սփյուռքի նախարարը մասնավորապես նշեց. «Գրքում ընդգրկված են 19-20-րդ դարերի հայ նշանավոր գրողներ, նկարիչներ, երաժիշտներ, ճարտարապետներ, վաճառականներ, որոնց ստեղծագործական կյանքը կապված է նաեւ մեր հարեւան Իրանի հետ: Կարծում եմ, այս աշխատությունը կնպաստի, որ նոր սերունդները կապվեն ազգային արմատներին և մշակույթին: Ալիս Նավասարգյանի գիրքը հայ ազգային ոգու մշակութային անձնագիրն է աշխարհի բոլոր ծայրերում: Անգլերենով գրված այս գիրքը բաց է նաեւ անգլախոս ընթերցողի առաջ: Ինձ համար նրա գործունեությունը էական է հեռավոր Ամերիկայում, քանի որ ինչ էլ ստեղծի՝ գրի, հավաքագրի, նվիրված է լինելու Հայաստանին ու հային: Հայապահպանությունը մեր հիմնական խնդիրն է Սփյուռքում, մենք պետք է պահպանենք այն ամենն, ինչով հպարտանում ենք այսօր»:

Սփյուռքում հայկական արվեստը տարածելու և ճանաչելի դարձնելու, ինչպես նաև իր ստեղծագործական գործունեությամբ Հայաստան-Սփյուռք գործակցության զարգացման գործում ներդրած մեծ ավանդի համար Սփյուռքի նախարար Հրանուշ Հակոբյանը հեղինակին պարգեւատրեց ՀՀ սփյուռքի նախարարության Արշիլ Գորկի մեդալով:

Շնորհակալական խոսքով հանդես եկան Իրանի դեսպանության մշակույթի կենտրոնի մշակույթի գծով խորհրդատու Մ.Շիրավանդը, ՀՀ ԳԱԱ գրականության եւ արվեստի ինստիտուտների տնօրեններ Ա.Իսահակյանը եւ Ա.Աղասյանը, Հ.Պարոնյանի անվան երաժշտական կոմեդիայի պետական թատրոնի գեղարվեստական ղեկավար Ե.Ղազանչյանը, ԵՊՀ ռեկտոր Ա.Սիմոնյանը, ՀՀ մշակույթի նախարարության ժամանակակից արվեստի վարչության պետ Ս.Գեղամյանը, ակադեմիկոս Վ.Բարխուդարյանը, գրող, բանաիրական գիտությունների դոկտոր, պրոֆեսոր Ա.Հարությունյանը եւ այլք:

Միջոցառմանը հնչեցին նաեւ հայկական մեղեդիներ սիմֆոնիկ երգչախմբի կատարմամբ: