Կայացավ ԱՊՀ երկրների հայկական երիտկազմակերպությունների առաջին համաժողովը

Նոյեմբերի 16-19-ը ՌԴ Դոնի Ռոստով քաղաքում ՀՀ սփյուռքի նախարարության նախաձեռնությամբ և Դոնի նախիջևանյան հայկական համայնքի, Ռուսաստանի հայերի միության աջակցությամբ կայացավ ԱՊՀ երկրների հայկական երիտասարդական կազմակերպությունների ղեկավարների և ներկայացուցիչների առաջին համաժողովը: Համաժողովին մասնակցում էր ՀՀ սփյուռքի նախարարության պատվիրակությունը, որի կազմում ընդգրկված էին ՀՀ սփյուռքի նախարարի տեղակալ Վ.Ջիլավյանը, նախարարի խորհրդական Ս.Պետրոսյանը, Համահայկական ծրագրերի վարչության պետ Ա.Մխիթարյանը, ԱՊՀ հայ համայնքների վարչության պետ Ա.Արշակյանը: Համաժողովի աշխատանքներին իրենց ակտիվ մասնակցությունն էին բերել ավելի քան 100 հայ երիտասարդ ԱՊՀ երկրներից:

Բացման խոսքով հանդես եկան տեղի հայ համայնքի ղեկավար Հ.Սուրմալյանը, գլխավոր հյուպատոս Ա.Գոմցյանը: «21-րդ դարի մարտահրավերները և հայ երիտասարդության հիմնախնդիրները» խորագրով զեկուցմամբ հանդես եկավ ՀՀ սփյուռքի նախարարության համահայկական ծրագրերի վարչության պետ Ատոմ Մխիթարյանը: Համաժողովի մասնակիցները ներկայացնում էին ՌԴ տարբեր շրջաններ (Մոսկվա, Սանկտ- Պետերբուրգ, Դոնի Ռոստով, Կրասնոդար, Մոզդոկ, Կիսլովոդսկ, Օրենբուրգ, Նիժնի Նովգորոդ, Պերմ, Սարատով և այլն), ինչպես նաև Ուկրաինան, Բելառուսը, Ղրղզստանը և Աբխազիայի հայ համայնքի ներկայացուցիչները:

Երիտասարդական կազմակերությունները ներկայացրին իրենց գործունեությունը: Նրանք նախաձեռնություն հանդես բերեցին ստեղծել հակահայկական քարոզչության դեմ պայքարի ճակատ, իրականացնել Հայոց ցեղասպանության ճանաչման, դատապարտման և հետևանքների վերացմանն ուղղված միջոցառումներ և Սփյուռքում հայապահպանությանը նպաստող ծրագրեր:

Համաժողովի ընթացքում երիտասարդ առաջնորդները կիսվեցին իրենց փորձով և ներկայացրին համատեղ ծրագրեր ու միջոցառումներ իրականացնելու տարբեր առաջարկություններ: Առաջարկվեց սկսել ԱՊՀ երկրների հայկական երիտասարդական կազմակերպությունների համակարգող խորհրդի ձևավորման գործընթաց: Քննարկումների արդյունքում որոշվեց ստեղծել նախաձեռնող խումբ, որը կմշակի համակարգող խորհրդի կայացման համար անհրաժեշտ փաստաթղթերը: Նախաձեռնող խմբում ընդգրկվեցին տարբեր երիտասարդական կառույցների ներկայացուցիչներ և ՀՀ սփյուռքի նախարարության աշխատակիցներ: