Տիգրան Սարգսյանի «նշտարն» ու ՀՀ դատարանների «կորեյկոները»

Մինչ վարչապետ Տիգրան Սարգսյանն իր նշտարն է սրում՝ պետական մեքենայի կոռումպացված ոլորտները վիրահատության ենթարկելու համար, իսկ այդ ընթացքում շարքային քաղաքացիները մատնացույց են անում, թե ինչն է պետք կտրել-թափել և որպես ամենակոռումպացված ոլորտ մատնացույց անում արդարադատական համակարգը, պարզվում է, «վիրաբույժ» Սարգսյանին լուրջ վտանգ է սպառնում և, շատ հնարավոր է, որ պահի ազդեցության տակ նրան սխալ դիագնոզ հրամցնեն, ինչի պատճառով վիրաբուժության ասպարեզում դեռ առաջին քայլերն անող մեր մասնագետը կարող է և որակազրկվել: Ցանկանալով զերծ պահել հայոց վարչապետին հնարավոր ճակատագրական սխալներից՝ փորձենք ներկայացնել այն, ինչ կարողացանք պարզել կոնկրետ դատական դեպարտամենտի հետ կապված:

Պարզվում է՝ արդարադատություն իրականացնող մեր «կոռուպցիոներներից» շատերը նույնիսկ սեփական մեքենա ունենալու հնարավորություն չունեն:

Հանրության աչքում ամենամեծ կոռուպցիոների համարումն ունեցող Արման Մկրտումյանը, օրինակ, սեփական ավտոմեքենա չունի: Վճռաբեկ դատարանի նախագահը, ճիշտ է, ստանում է 1,5 մլն դրամի չափով աշխատավարձ, սակայն սեփական փոխադրամիջոց չունի և երթևեկում է ծառայողական «Toyota Camry»-ով: Իսկ որդին՝ Գոռը, նման պապա ունեցող մեկը՝ որպես ոսկե երիտասարդության վառ ներկայացուցիչ, իրականում ավելի քան թշվառ վիճակում է իր՝ 2002թ. արտադրության «Peugeot 307»-ով: Անցյալ տարի թոշակի անցած Վճռաբեկ դատարանի դատավոր Հովհաննես Ղուկասյանը, չնայած ստանում էր դարձյալ մեկ միլիոն դրամը գերազանցող աշխատավարձ, սակայն մինչև պաշտոնավարման վերջին օրն աշխատանքի էր ներկայանում 1989թ. արտադրության «06»-ով: Իսկ ահա դատարանի նախագահները, ավելի ստույգ՝ դատարանների 21 նախագահներից 17-ը, ծառայողական «31»-երի հույսին են: Դատական դեպարտամենտի թշվառությունը, սակայն, «06»-երով ու «31»-երով չի սահմանափակվում. այստեղ կան դատավորներ, որոնք անգամ այդ «06»-երն ու «31»-երը չունեն և գործի են գնում ոտքով կամ տրանսպորտով:

Դատական դեպարտամենտը 2013թ. բյուջետային քննարկումների ժամանակ, իհարկե, ճիգեր գործադրեց գոնե դատարանների նախագահների պահով անարդարությունը շտկել, սակայն Ֆինանսների նախարարությունն ավելի քան անհողդողդ էր և մերժողական պատասխան տվեց՝ պատճառաբանելով, թե ուրիշ կառույցներ էլ են ավտոմեքենաներ գնելու հայտեր ներկայացրել՝ ընդհանուր հաշվով շուրջ 2000 մեքենա, այնպես որ որևէ մեկին չեն կարող առանձնացնել, դրա համար էլ բոլորին մերժում են:

Վիրահատական եղանակով կոռուպցիայի դեմ պայքարելու մասին վարչապետի հայտարարությունից հետո բավական ժամանակ է անցել, սակայն այդպես էլ վարչապետի նշտարը կարծես թե գործի չի դրվում: Ըստ երևույթին, վարչապետն էլ մեզ նման փորձում է ստույգ դիագնոզ կազմել, նոր անցնել գործի և, ըստ երևույթին, մեզ նման վարչապետն էլ որոշել է դատողություններ անել ոչ թե ասենք դատարանների դիմաց ամեն օր կանգնող արտասահմանյան շքեղ ավտոմեքենաներով, դրանց տերերի առանձնատներով, ծախսերով, վարքուբարքով, ժողովրդի մեջ պտտվող խոսակցություններով, այլ նախապատվությունը տալիս է պաշտոնական տեղեկատվությանն ու լսում ոլորտի ղեկավարների հաշվետվությունները: Իսկ դրանից, ինչպես տեսնում ենք, միայն մի դիագնոզ կարելի է տալ. սա ոչ թե կոռումպացված, այլ պարզապես հանելուկային ոլորտ է, ուրիշ ոչինչ: Իսկ հանելուկը նրա մեջ է, թե ինչպես է ստացվում, որ «31»-երով ու «06»-երով ապրողներին նման բաներ են վերագրում:

Լուսինե Կեսոյան