Երբ է Նազենի Հովհաննիսյանը «այո» ասում

Դերասանուհի, հաղորդավարուհի Նազենի Հովհաննիսյանը շատ հեշտ կողմնորոշվեց իր «այո»-ներն ու «ոչ»-երը տարանջատելիս: Նազենին նշեց, որ կյանքում կտրուկ «այո» կամ «ոչ» դժվար է ասում, քանի որ իր «ոչ»-ը «ոչ» է, իսկ երբ ասում է՝ «այո», դառնում է դրա գերին:

ԱՅՈ

Աստված մեզ արարել է և արարելու հնարավորություն տվել. կյանքում ամեն ինչ դրա վրա է հիմնված: Յուրաքանչյուր ոք պետք է աշխատասեր լինի, որպեսզի կարողանա նորն արարել: Ասում եմ՝ «այո» աշխատասիրությանը:

ՈՉ

Ծուլությունից վատ «կենդանի» աշխարհում գոյություն չունի: Ասում եմ՝ «ոչ» ծուլությանը, քանի որ այն հղի է մեծ վտանգներով:

ԱՅՈ

Քրիստոնեությունն ամենակարևորն է: Միանշանակ ասում եմ՝ «այո» հավատքին:

ՈՉ

Առանց հավատքի կյանքը կորցնում է իր իմաստը: Ասում եմ՝ «ոչ» անհավատությանը, քանի որ կյանքում ամեն ինչ հիմնված է հավատքի վրա:

ԱՅՈ

Իհարկե, բոլորիս մոտ էլ լինում են հուսահատության պահեր, սակայն պետք է կարողանալ հաղթահարել դա և առաջ նայել, որտեղ նոր հորիզոններ կան: Ես ամեն անգամ հաղթահարում եմ հուսահատությունն ու ասում՝ «այո» լավատեսությանը։

ՈՉ

Հուսահատությունը կարող է հանգեցնել ծուլության, ծուլությունը՝ հոռետեսության, հոռետեսությունը՝ անկման, անկումը՝ կործանման: Ասում եմ՝ «ոչ» հուսահատությանը:

ԱՅՈ

Ասում եմ՝ «այո» մարդասիրությանն ու հայրենասիրությանը, քանի որ դրանք հիմնարար արժեքներ են: Յուրաքանչյուր մարդ պետք է ունենա կյանքում առաջնորդող արժեքներ: Մեկի համար դա կարող են լինել ծնողները, մյուսի համար՝ հայրենիքը և այլն: Շատ կարևոր է արժեքներ ունենալը, քանի որ դրանց բացակայությամբ մարդ չի կարող հայրենասեր և մարդասեր լինել:

ՈՉ

Բամբասանքը պարապ մարդկանց զբաղմունք է, ովքեր օրը լցնելու այլ տարբերակ չունեն: Ասում եմ՝ «ոչ» բամբասանքին, քանի որ այդպիսով կարելի է խաղալ այլ մարդկանց ճակատագրերի հետ:

esyes.am