«Վրաստանում կոռուպցիա չկա»-ն նույնն է, ինչ «ԽՍՀՄ–ում սեքս չկա». Կանդելակի (լուսանկարներ)

Ազգությամբ վրացի հայտնի հաղորդավարուհի Թինա Կանդելակին իր բլոգում լուսանկարներ է տեղադրել՝ անդրադառնալով Վրաստանում առկա կոռուպցիային և նախագահ Միխեիլ Սաակաշվիլիի «դարաշրջանին»։

«Այնքան հաճախ եմ լսում, որ «Վրաստանում կոռուպցիա» չկա, որ ցանկանում եմ այն նույն հարթության վրա դնել «ԽՍՀՄ-ում սեքս չկա» արտահայտության հետ»,- գրել է Կանդելակին։

Որպես կոռուպցիայի վառ օրինակ՝ նա առանձնացրել է նախագահ Սաակաշվիլիի մեկշաբաթյա շռայլ հանգիստն Իտալիայում։

«Ոչ վաղ անցյալում Միշիկոն նկատվել է իտալական Մերանո քաղաքի հանգստյան տներից մեկում։ Այս հանգստյան տանը սովորաբար զվարճանում է Ուկրաինայի ղեկավար էլիտան, նաև՝ Դիեգո Մարադոնան։ Վատ ընկերակցություն չէ։ Սակայն հանգստի և բուժման կուրսի գինը մթագնում է այն»,-գրել է նա։

Կանդելակին տեղեկացրել է, որ երկու ննջասենյակներից բաղկացած լյուքս համարը, որտեղ մնացել է Սաակաշվիլին, արժե օրը 1 350 եվրո, իսկ բուժական 6-օրյա կուրսը՝ 2 860 եվրո։ Այն ներառում է դիետա,մերսումներ...

Նախագահն ընդհանուր առմամբ առողջարանում մնացել է մեկ շաբաթ. 1350 եվրո x 7+2860 եվրո=12,310 եվրո.լրացուցիչ ծախսերով՝ 15.000 եվրո։ Եվս 100.000 դոլար է արժենում ավիաթռիչքն անձնական ինքնաթիռով՝ Թբիլիսի-Մերանո-Թբիլիսի ուղղությամբ։

«Չեմ հաշվում էլիտար ռեստորանները. Միխեիլն իսկական գուրման է»,-նկատում է Կանդելակին։

Նրա հավաստմամբ՝ այդ գումարն առնչություն չունի նախագահի համեստ աշխատավարձի հետ։ 2012թ.-ի զեկույցից պարզ է դառնում, որ Միխեիլ Սաակաշվիլիի ամսական աշխատավարձը կազմում է 4 720 լարի՝ մոտ 90 հազար ռուբլի։ Ստացվում է, որ մեկ շաբաթվա հանգստի համար նախագահը ծախսում է կես տարվա աշխատավարձ, իսկ թռիչքն արժե նրա 3 տարվա աշխատավարձը։

«Շարքային վրացին պետք է 45 տարի աշխատի (ճիշտ այնքան, որքան Սաակաշվիլիի տարիքն է), որպեսզի հանգստանա այն սպա կենտրոնում, որտեղ հանգստանում է սիրելի նախագահը»,-գրում է Կանդելակին։

Tert.am