«Ժողովուրդ». ՊԲ–ում որոշ անձանց իրավունքները զինվորների տեղափոխման հարցում կասեցվել են

«Ժողովուրդ»-ի աղբյուրների փոխանցմամբ` մի քանի ամիս է` հայոց բանակում զինվորների տեղափոխման հարցը դարձել է ՀՀ պաշտպանության նախարար Սեյրան Օհանյանի և ՀՀ ԶՈՒ գլխավոր շտաբի պետ, գեներալ-գնդապետ Յուրի Խաչատուրովի մենաշնորհը: Բանակային կորպուսի հրամանատարներն ու զորամասի հրամանատարներն այլևս չեն կարող ինքնուրույն որոշել, թե որ զինվորը որտեղ է պիտանի ծառայության: Այս ճանապարհով Սեյրան Օհանյանը փորձում է այնպիսի իրավիճակ ստեղծել, որ բանակի հետ կապված ցանկացած հարցով ուղիղ իրեն դիմեն կամ առնվազն ինքը տեղյակ լինի, թե ով է բանակում «հարցեր լուծում»: Ու այս գործընթացը նախարարի PR-շիկները մատուցում են իբրև կոռուպցիայի դեմ իսկական պայքար:

Սակայն ՊՆ մամուլի խոսնակ Արծրուն Հովհաննիսյանը «Ժողովուրդ»-ի հետ զրույցում, մեկնաբանելով տեղեկությունը, նշեց, թե այն չի համապատասխանում իրականությանը: «Պաշտպանության նախարարը զինվորների տեղափոխման խնդիրներով չի զբաղվում: Նախարարի գործառույթները շատ ավելի մեծ ու կարևոր բաներն են: Նշեմ նաև, որ պաշտպանության բանակում որոշ անձանց իրավունքները զինվորների տեղափոխման հարցում կասեցվել են կոռուպցիոն ռիսկերը նվազեցնելու նպատակով և այդ ոլորտում կոռուպցիոն ռիսկերը զգալի նվազել են»,-հավելեց խոսնակը՝ ըստ էության հաստատելով տեղեկությունը