Բացի իրենից՝ ում է տեսնում ընդդիմության միասնական թեկնածու Րաֆֆի Հովհաննիսյանը

«Ժառանգություն» կուսակցության առաջնորդ Րաֆֆի Հովհաննիսյանի կարծիքով՝ եթե բանակացությունների մասնակցող քաղաքական կուսակցությունները կարողանան բացառության կարգով շեշտը դնել ընդհանրությունների վրա, ոչ թե՝ տարբերությունների. ընդդիմության միասնական թեկնածուի գաղափարը սարերի ետևում չէ։

«Ընդդիմության միասնական թեկնածուի վերաբերյալ Բաքվից վերադառնալուց հետո լիարժեք կպատասխանեմ»։ Այս մասին լրագրողների հետ հանդիպմանն ասաց «Ժառանգություն» կուսակցության առաջնորդ Րաֆֆի Հովհաննիսյանը և հավելեց. «Միասնական թեկնածու ունենալը ոչ թե հնարավոր է, այլ՝ անհրաժեշտ։ Աստված վերևում է, բայց ես մտադրված եմ առաջադրվելու, եթե մեր կուսակցությունները, հասարակությունն ուզում է փոփոխություն, նոր Հայաստան, դե յուրե իշխանություն, ովքեր բանակցում են, ներկայումս կփորձեն ինձ հետ միասին հասնել այդ ամենին, կողջունեմ այդ կուսակցությունների աջակցությունը։ Եթե ամեն մեկը գնա իր ճամփով, փոփոխություններն անհնար են։ Հավաքական թեկնածությունը չունի մրցակից։ Ոչ մի կուսակցություն առանձին վերցված չի կարող այս հարցը լուծել»։

Րաֆֆի Հովհաննիսյանը նկատում է նաև, որ ԲՀԿ-ն ուշ եկավ կոնսուլտացիաներ կազմակերպելու որոշմանը, բայց և ողջունում է, որ ստեղծվել է ընդհանուր դաշտ։

«Պետք չէ որևէ ինտրիգ և դավային տեսություն որոնել այդ հանդիպումների մեջ, մի քիչ ուշացած է, բայց Հայաստանի պարագայում նորմալ երևույթ է»,-ասաց կուսակցության առաջնորդը։

Այն հարցին, թե ինքը բացի իրենից՝ ընդդիմության միասնական թեկնածու ուրիշ մեկին տեսնում է պատասխանեց. «Եթե այդ միասնական թեկնածուն կբերի ժողովրդի հաղթանակ ես ոչինչ չեմ բացառում»։