ՀՀԿ-ի փախուստն ու պայքարը կյանքի գնով

Այսօր ընդդիմադիր ուժերի կողմից հրավիրված արտահերթ նիստը չկայացավ։ Քվորում չապահովվեց, ներկա էին 44 պատգամավոր։ Թե ինչու նիստին չէին ներկայացել մի քանի ԲՀԿ-ականներ և անձամբ Գագիկ Ծառուկյանը, ԲՀԿ խմբակցության քարտուղար Նաիրա Զոհրաբյանն ասաց. «Մի քանիսը գտնվում են արտերկրում, մի քանիսն էլ ունեն առողջական լուրջ խնդիրներ, իսկ թե ինչու ներկա չէր Գագիկ Ծառուկյանը ես չգիտեմ։ Դիմե՛ք խոսնակին, ես տեղյակ չեմ՝ պարոն Ծառուկյանը Հայաստանում է, թե՝ արտերկրում»։ 

Խոսելով ՀՀԿ-ի՝ նիստին չմասնակցելու մասին, ԲՀԿ-ական պատգամավորն ասաց, որ կանխատեսելի էր, որ խորհրդարանական մեծամասնությունը փորձելու է տապալել քվորումը. «Զարմանալի է, որ մեծամասնությունը, որ իր պնդմամբ լրջագույն ասելիք, լրջագույն փաստարկներ ունի, խուսափեց գալ և խորհրդարանում ներկայացնել իր տեսակետը»։

Անդրադառնալով այն դիտարկմանը, որ հանրապետականները նշում են, թե ՀԱԿ առաջարկը ժամանակավրեպ էր, Զոհրաբյանն ասաց, որ ՀՀԿ մեկնաբանություններից պարզ է դառնում, որ իրենց համար մշտապես կամ ուշ է, կամ՝ շուտ. «Ցանկացած ժամանակ, ցանկացած պատեհ հնարավորություն պետք է օգտագործել։ Եվ քանի որ ՀԱԿ առաջարկն արվեց և այն համահունչ էր քաղաքական կոնսուլտացիաներին ընդառաջ մեր արած հայտարարությունների սկզբունքայնությանը, մենք միացանք նախաձեռնությանը և գտնում ենք, որ ուշ կամ շուտ չի լինում»։

Լուրեր.com-ի լրագրողի այն դիտարկմանը, որ, ըստ էության, ՀՀԿ քայլը բոյկոտ չէր, քանի որ նախապես այդ մասին չէր հայտարարվել, Զոհրաբյանն ասաց. «Իհարկե, սա բոյկոտ չէր, սա փախուստ էր, իսկ փախուստը թուլության նշան է։ Սա նշանակում էր փասխուստ նիստից, սա բոյկոտ չի։ Բոյկոտը ինքնին քաղաքական տերմինալոգիա է, քաղաքական քայլ է, գործիք է։ Սա փախուստ էր նիստից՝ նիստը տապալելու համար։ Եթե իրենց արգումենտները հիմնավոր էին, քաղաքականապես ճիշտ կլիներ, որ թույլ տային նիստը լիներ, քվորումը լիներ, իսկ իրենք էլ ի լուր աշխարհի ներկայացնեին իրենց աննախադեպ հիմնավորումները»։

Զոհրաբյանի խոսքերով՝ փախուստն ուղղակիորեն հերթական անգամ ապացուցում է, որ իրենք կյանքի գնով չեն ցանկանում հրաժարվել մեծամասնական ընտրակարգից, որովհետև դա այն բոնուսն է, որ իշխող կուսակցությունն ընտրություններից առաջ ստարտային վիճակում ունի իր գրպանում։