Սաակաշվիլին համեմատել է Վրաստանի նոր իշխանություններին Ռոբեսպիերի գիլիոտինների հետ

Վրաստանի նախագահ Միխայիլ Սաակաշվիլին քննադատության է ենթարկել երկրի նոր ղեկավարության ներկայացուցիչներին վերջին շրջանում իրականացրած ձերբակալությունների կապակցությամբ։ Ինչպես հաղորդում է REGNUM-ը, Վրաստանի նախագահը հայտարարել է, որ այդ ամենն առաջացնում է հասարակության, ինչպես նաև Վրաստանի արևմտյան գործընկերների անհանգստությունը։

Սաակաշվիլիի պնդմամբ՝ նոր կառավարության ներկայացուցիչները հայտարարում են, որ «ամեն ինչ ենթակա է ձերբակալության»։ «Հանրային և ոչ հրապարակավ ելույթներում հնչում է այսպիսի ուղերձ, և դա անհանգստություն է առաջացնում»,-ասել է Սաակաշվիլին։

Նա նաև ընդգծել է, որ այս կապակցությամբ նա ակամա հիշում է ֆրանսիական հեղափոխության առաջնորդներից մեկին՝ Մաքսիմիլիան Ռոբեսպիերին։

«Նրա հրամանով՝ Ֆրանսիայում մեկ օրվա ընթացքում գլխատել են մի քանի մարդու։ Նա ելույթ ունեցավ խորհրդարանում և ասաց, որ բոլորին կձերբակալեն։ Իսկ խորհրդարանը հանդուրժեց, սակայն հետո կայացրեց նրա մահվան դատավճիռը»,-հիշեցրեց Սաակաշվիլին։