ԱԺ-ի դերը զրոյացվում է. ՀՅԴ պատգամավոր

Այսօր ՀՀ ԱԺ-ում հրավիրված էր արտահերթ նիստ։ Արտահերթ նիստը չկայացավ, քանի որ քվորում չապահովվեց։ Ներկա չէին իշխող հանրապետականներն ու ՕԵԿ-ը։

Լրագրողների հետ զրույցում ՀՅԴ պատգամավոր Արմեն Ռուստամյանը կարծիք հայտնեց, որ մեծամասնության այս քայլն արհամարհանք է ԱԺ-ի նկատմամբ:

«Նրանց ներկայանալը պարտավորություն էր, ոչ թե իրավունք: Մեծամասնությունն այդ տարրական բանը չգիտի, որ պետք է գային և ներկայանային նիստին: Սա բոյկոտ չէր։ Այս քայլով ԱԺ-ի դերը զրոյացվում է։ Պարտավորության խախտում կա ոչ միայն պատգամավորների, այլև ԱԺ նախագահության կողմից։ Այս հարցով պատրաստվում ենք դիմել էթիկայի հանձնաժողովին»,-ասաց Ռուստամյանը և հավելեց, որ կա՛մ պետք է բոլորն ասեն միասին՝ ղեկավարության հրահանգով, հիվանդացել էին, և բժշկի թուղթ բերեն, կա՛մ պետք է ասեն, որ պարզապես թքած ունեն օրենքների վրա։