«Ծառուկյան - նախագահ». Որոշումը կայացված է

«Ամենաշատը կորցնելու բան ես ունեմ, եթե որևէ մեկը վախենում է, թող հետ կանգնի, ես իրեն ոչ մի բան չեմ ասի». սա ԲՀԿ առաջնորդ Գագիկ Ծառուկյանի ներքին հրահանգն է յուրայիններին: Այսպիսի բան կարող է հայտարարել միայն այն մարդը, ով հստակ պատրաստվում է հակադրվել իշխանություններին և լավ հասկանում, թե դա ինչ հետևանքներ կարող է ունենալ:

Այսօր սպասվում էր, որ ԲՀԿ առաջնորդը վերջապես կգա խորհրդարան՝ ընդդիմության նախաձեռնած արտահերթ նիստին մասնակցելու, և որոշ փակագծեր կբացի: Ծառուկյանը, սակայն, չեկավ. նրա գտնվելու մասին անգամ կուսակիցները տեղյակ չէին, փոխարենը Ծառուկյանը երկու տողանոց հարցազրույց տվեց, ազդարարելով, որ որոշումն արդեն կայացրել է:

Այս պահի դրությամբ ծառուկյանական ներքին հրահանգը կուսակցականների արտահոսք դեռևս չի առաջացրել: ԲՀԿ վարկանիշի վրա ազդող միակ գործոնը Սամվել Բալասանյանի՝ թիվ 35 ընտրատարածքում Արման Սահակյանին պաշտպանելու փաստն է, սակայն սա էլ, ըստ էության, ոչ այդքան քաղաքական, որքան «տղայական» պայմանավորվածությունների շարքից է: Բալասանյանը նախապես պայմանավորվածություն է ունեցել Արման Սահակյանի հետ, թե՝ «թող ես ընտրվեմ, եթե դարձա քաղաքապետ, քեզ հաստատ կպաշտպանեմ»: Սահակյան Արմանն իր պահով հարգել է պայմանավորվածությունը, որից հետո եկել է Բալասանյանի հերթը: ԲՀԿ-ական քաղաքապետն էլ այդ մասին հայտնել է իր ղեկավարին, թե՝ էսպես ու էսպես, «տղայական պայմանավորվածություն ունեմ, շեֆ ջան», իսկ քանի որ Գագիկ Ծառուկյանը՝ որպես իսկական տղամարդ, տղայական պայմանավորվածություններ հարգող է, ձայն չի հանել և թույլ է տվել իր կուսակցականին՝ արդեն ընդդիմադիր դաշտում ճախրող կուսակցության համար ավելի քան զարմանահրաշ հայտարարություններ անել ու ՀՀԿ-ԲՀԿ գործարքների վերաբերյալ խոսակցությունների առիթ տալ:

Այսօր իշխանությունը ևս մեկ անգամ ապացուցեց, որ երկրում ամեն ինչ իր ձեռքում է. խորհրդարանի նիստեր անել-չանելը, ընտրությունների հետ կապված օրենսդրական փոփոխություններ կատարել-չկատարելն իր ցանկությունների տիրույթում է՝ միայն ու միայն: Արտահերթ նիստ հրավիրելու համար ստորագրություններ հավաքելու ժամանակ Լևոն Զուրաբյանն ասում էր, թե սա մարտահրավեր է իշխանություններին, եթե իսկապես այդքան ուժեղ են, չեն վախենում, ուրեմն՝ թող մասնակցեն արտահերթին ու փոփոխություններ անեն: ՀՀԿ-ն մարտահրավերն ընդունեց յուրովի, և չմասնակցելով՝ տապալեց նիստը. քվորում չկա, նիստ էլ չկա: ԲՀԿ քարտուղար Նաիրա Զոհրաբյանը հայտարարեց, թե սա «փախուստ էր, իսկ փախուստը թուլության նշան է»:

Իհարկե, թե՛ ԲՀԿ-ն, թե՛ ՀԱԿ-ը ՀՀԿ-ականների վախկոտության վերաբերյալ է՛լ ավելի համարձակ հայտարարություններ կարող են անել, կարող են անգամ յուրաքանչյուր պատգամավորի անուն-ազգանունով հատուկ գործ կազմել՝ ապացույցներ հավաքելով, ենթադրենք, Մհեր Սեդրակյանի կամ Մանվել Գրիգորյանի՝ մարտահրավերներից խուսափելու և այլ անհավանական արկածներից, սակայն փաստը մնում է փաստ, և դա անառարկելի է, Հայաստանում ասողը նա է, ով կարողանում է իրենով անել Բաղրամյան 26-ը, և եթե Բաղրամյան 26-ում նստողը որոշում է, որ ընդդիմությանը կարելի է փաղաքշել, ընդդիմության հետ կարելի է ինչ-ինչ հարցեր քննարկել, հարցերը քննարկվում են, փաղաքշանքն էլ կազմակերպվում բարձր մակարդակով: Հենց սա է, որ, ըստ երևույթին, վերջապես լիարժեք կերպով հասկացել է ԲՀԿ առաջնորդը և հենց սա է, որ դրդել է նրան վերջապես կայացնել իր պատմական որոշումը:

Թե քանի օրից կամ ժամից կգաղտնազերծվի ծառուկյանական որոշումը, երևի թե արդեն էական էլ չէ՝ հաշվի առնելով, որ առաջադրմանն այդքան էլ շատ ժամանակ չի մնացել, այնպես որ վաղ թե ուշ դա կարվի: Ինչ վերաբերում է զուտ «Գագիկ Ծառուկյան-նախագահ» փաստին, ապա դրան միայն և միայն հարկավոր է դրական վերաբերվել: Կարելի է անգամ մի քիչ էլ թեթևացած շունչ քաշել առ այն, որ Ծառուկյանի ներկայությամբ նախագահական քարոզարշավը գոնե հետաքրքիր նրբերանգներ կստանա: Ի վերջո, Ծառուկյանի կարգի խարիզմատիկ մրցակից ունենալու փաստից անգամ Սերժ Սարգսյանը պետք է որ գոհ լինի. մի բան է՝ մրցակցել էպոսագետի, օրը մեջ փոշմանող Րաֆֆի Հովհաննիսյանի կամ, Աստված գիտե, թե էլ ում հետ, մեկ այլ բան՝ գրեթե կեսմիլիոնանոց ընտրազանգված ձեռք բերած կուսակցության առաջնորդի, ով, ի դեպ, Սարգսյանին «նախագահ ջան»-ից բացի բան չի ասել:

Լուսինե Կեսոյան