Ռուսաստանում բացառել են ԱՄՆ-ի հետ միավորումը Չինաստանի դեմ՝ պատժամիջոցների դիմաց

Ռուսաստանը չի միավորվի ԱՄՆ-ի հետ Չինաստանի դեմ անգամ եթե դրա դիմաց առաջարկվի Ռուսաստանի դեմ կիրառվող պատժամիջոցների լիակատար վերացում։ Այդ մասին «Լենտա.ռու»-ին հայտարարել է Պետդումայի միջազգային հարաբերությունների հանձնաժողովի փոխնախագահ Սվետլանա Ժուրովան՝ մեկնաբանելով ամերիկացի փորձագետների հայտարարությունները։

Նրա խոսքով՝ Ռուսաստանի և Չինաստանի միջև ստորագրված է ռազմավարական գործընկերության համաձայնագիր, ինչը նման սցենարը դարձնում է անհնար։ Ժուրովան նաև կասկածի տակ է դրել այն մոտեցումը, ըստ որի Չինաստանը դիտարկվում է որպես ԱՄՆ-ի հիմնական թշնամի՝ նշելով, որ Վաշինգտոնը մի շարք ոլորտներում կախված է Պեկինից և, հավանաբար, փորձում է այդ կախվածությունը նվազեցնել՝ վերահսկելով նաև բիզնես միջավայրը։ Պատգամավորը հավելել է, որ Չինաստանի հասարակությունը համակերպված է սեփական համակարգին, անկախ արտաքին քննադատություններից։

Ժուրովան ընդգծել է, որ Չինաստանը բազմամիլիարդանոց բնակչություն ունեցող միջուկային տերություն է՝ իր ավանդույթներով և կառավարման մոդելով, ինչի պատճառով ԱՄՆ-ի համար դժվար կլինի այնտեղ պարտադրել սեփական «ժողովրդավարական» օրակարգը։ Նրա կարծիքով՝ Ռուսաստանի հասցեին նման առաջարկները կարող են դիտարկվել որպես միջազգային գործընկերության «դիմացկունության փորձություն», այլ ոչ թե իրական քաղաքական ծրագիր։