«Բավարիայի» տնօրենն անդրադարձել է Դայո Ուպամեկանոյի պայմանագրի ժամկետի երկարաձգման շուրջ ստեղծված իրավիճակին

Մյունխենի «Բավարիայի» գործադիր տնօրեն Յան-Քրիստիան Դրեզենն անդրադարձել է թիմի ֆրանսիացի պաշտպան Դայո Ուպամեկանոյի պայմանագրի ժամկետի երկարաձգման շուրջ ստեղծված իրավիճակին։

«Ուպամեկանոն մեզանից բարելավված առաջարկ է ստացել։ Մենք դա բազմիցս քննարկել ենք նրա գործակալների, իսկ այժմ՝ նաև անձամբ իր հետ։ Կարծում եմ՝ նա պետք է ստորագրի այն, ինչ կա, քանի որ առաջարկն այլևս չի լավանալու։ Այս ամբողջ պատմությունը չի կարող անվերջ ձգձգվել։ Ես պարզապես չեմ ուզում հիմա հստակ ժամկետ նշել, քանի որ այն հայտնի կդառնա ավելի ուշ։ Եթե մաստակը երկար ես ծամում, ի վերջո դրա համը կորչում է։ Ուստի պետք չէ ձգձգել գործընթացը մաստակ ծամելու պես»,- Դրեզենի խոսքերն է մեջբերում T-online-ը։

Հիշեցնենք, որ Ուպամեկանոն «Բավարիա» է տեղափոխվել 2021 թվականի ամռանը  «Լայպցիգից»։ Ընթացիկ մրցաշրջանում ֆուտբոլիստը մյունխենյան ակումբի կազմում մասնակցել է 21 հանդիպման՝ դառնալով 1 գոլի հեղինակ։ Ըստ Transfermarkt-ի՝ ֆրանսիացի պաշտպանի տրանսֆերային արժեքը գնահատվում է 60 միլիոն եվրո: