Սպիտակ տունը կասկածի տակ է դրել Դանիայի վերահսկողության օրինականությունը Գրենլանդիայի նկատմամբ

ԱՄՆ Սպիտակ տան աշխատակազմի ղեկավարի տեղակալ Սթիվեն Միլլերը հայտարարել է, որ Դանիայի վերահսկողությունը Գրենլանդիայի նկատմամբ իրավական տեսանկյունից կասկածելի է։ CNN-ին տված հարցազրույցում նա հարցադրել է, թե ինչ իրավական հիմքով է Կոպենհագենը վերահսկում կղզին և ինչի վրա են հիմնված Դանիայի տարածքային հավակնությունները։

Միլլերի խոսքով՝ ԱՄՆ-ի համար կարևոր է ապահովել Արկտիկայի տարածաշրջանի անվտանգությունը և պաշտպանել ՆԱՏՕ-ի շահերը, ինչի համար, նրա ձևակերպմամբ, «ակնհայտ է», որ Գրենլանդիան պետք է դառնա ԱՄՆ-ի մաս։ Երբ լրագրողները փորձել են պարզել՝ արդյոք Վաշինգտոնը բացառում է ռազմական ուժի կիրառումը կղզին իր վերահսկողության տակ վերցնելու համար, Միլլերը նշել է, որ նման միջոցների անհրաժեշտություն, իր կարծիքով, չի առաջանա՝ հաշվի առնելով Գրենլանդիայի փոքր բնակչությունը։

Միլլերի հայտարարությունները քննադատության են արժանացել Դանիայի կողմից։ Վաշինգտոնում Դանիայի դեսպան Յեսպեր Մյոլլեր Սյորենսենը հիշեցրել է, որ Դանիան ԱՄՆ-ի մերձավոր դաշնակիցն է և ակնկալում է իր տարածքային ամբողջականության լիարժեք հարգում։ Գրենլանդիայի վարչապետ Յենս-Ֆրեդերիկ Նիլսենը, մեկնաբանելով նաև սոցիալական ցանցերում տարածված սկանդալային հրապարակումները, նշել է, որ դրանք անհարգալից են, սակայն հավելել է, որ խուճապի պատճառներ ներկայումս չկան։