Թրամփին մեղադրում են իրականությունը խեղաթյուրելու մեջ

ԱՄՆ նախագահ Դոնալդ Թրամփի հայտարարությունը, թե Իրանի սպառնալիքը չեզոքացվել է, չի համապատասխանում իրականությանը։ Այս մասին հայտարարել է ԱՄՆ բանակի պահեստազորի փոխգնդապետ Դենիել Դևիսը՝ իր գրառմամբ X սոցիալական հարթակում՝ կասկածի տակ դնելով Վաշինգտոնի պաշտոնական գնահատականները։

Դևիսի խոսքով՝ չնայած ներկայացվող պատկերին, Իրանը շարունակում է կայուն վերահսկել իր պետական համակարգը և ակտիվ գործողություններ իրականացնել տարածաշրջանում։ Նա նշել է, որ իրանցիները շարունակում են հարվածներ հասցնել ամերիկյան ռազմական օբյեկտներին, հեռու պահել ԱՄՆ ռազմածովային ուժերը իրենց ափերից, խոցել կործանիչներ և վնասներ պատճառել ամերիկացի զինծառայողներին՝ միաժամանակ վերահսկելով նաև ռազմավարական նշանակություն ունեցող Հորմուզի նեղուցը։

Ամերիկացի նախկին զինվորականի գնահատմամբ՝ ԱՄՆ-ի, Իսրայելի և Իրանի միջև ռազմական լարվածությունը վնասել է ոչ միայն Վաշինգտոնին, այլ նաև մի շարք երկրների տնտեսություններին։ Միևնույն ժամանակ տարածաշրջանում լարվածությունը մնում է բարձր, իսկ միջազգային դերակատարները շարունակում են քննարկել հակամարտության հնարավոր զարգացումները և դրա հետևանքները։