ԵՄ-ը չի նահանջում․ Ռուսաստանից գազից հրաժարվելու ծրագիրը պահպանվում է՝ անգամ ճգնաժամի ֆոնին

Եվրամիությունը չի պատրաստվում վերանայել ռուսական հեղուկացված բնական գազից (LNG) հրաժարվելու իր ծրագիրը՝ նույնիսկ խորացող էներգետիկ ճգնաժամի պայմաններում։ Այս մասին հայտարարել է ԵՄ էներգետիկայի հանձնակատար Դեն Յորգենսենը՝ Financial Times-ին տված հարցազրույցում։ Նրա խոսքով՝ միությունը չի մտադիր փոփոխություններ անել օրենսդրության մեջ և անդամ երկրներին հորդորում է լրացուցիչ էներգակիրներ ձեռք բերել ԱՄՆ-ից և այլ «ազատ շուկայի» գործընկերներից։

Միևնույն ժամանակ, Մերձավոր Արևելքում պատերազմի և էներգակիրների գների կտրուկ աճի պայմաններում ԵՄ-ն արդեն ռեկորդային ծավալներով գազ է ներմուծում, այդ թվում՝ Ռուսաստանից։ 2026 թվականի մարտին ռուսական LNG-ի մատակարարումները աճել են 38 տոկոսով՝ հասնելով պատմական առավելագույնի՝ 2.5 միլիարդ խորանարդ մետրի։ Տարվա սկզբից ներմուծումը կազմել է 6.8 միլիարդ խորանարդ մետր, ինչը 20 տոկոսով գերազանցում է նախորդ տարվա ցուցանիշը։

Գազի գներն էլ շարունակում են ճնշում գործադրել շուկայի վրա․ մարտին Եվրոպայում գինը գերազանցել է 500 դոլարը հազար խորանարդ մետրի դիմաց՝ հասնելով մինչև 888 դոլարի։ Ապրիլի 2-ի դրությամբ, Նիդեռլանդների TTF հաբի մայիսյան ֆյուչերսները գնահատվել են 579–615 դոլար՝ զգալի աճ գրանցելով փետրվարի համեմատ։ Իսպանիայի կառավարության ներկայացուցիչ Էլմա Սաիսը զգուշացրել է, որ եթե Մերձավոր Արևելքում հակամարտությունը շարունակվի սրվել, Եվրոպան կարող է բախվել երկարատև էներգետիկ ճգնաժամի, որն արդեն միլիարդավոր եվրոների վնաս է հասցրել։