Երիտասարդ աղջիկը նետվել է Կիևյան կամրջից (ԹԱՐՄԱՑՎԱԾ՝ ՖՈՏՈ, ՏԵՍԱՆՅՈՒԹ)

Այսօր՝ հոկտեմբերի 27-ին, Կիևյան կամրջից նետվելով` ինքնասպանություն է գործել մի երիտասարդ աղջիկ: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, դեպքի վայր են ժամանել 1-03 շտապբուժօգնության ծառայության աշխատակիցները, սակայն աղջիկն արդեն մահացել է:

Քիչ առաջ ֆոտոլրագրող Գագիկ Շամշյանը հայտնեց, որ արդեն դեպքի վայր է ժամանել ոստիկանության Մաշտոցի բաժնի օպերատիվ խումբը, ինչպես նաև ոստիկանության քննչական գլխավոր վարչության Երևանի քննչական վարչության Մաշտոցի քննչական բաժնի քննիչները` քննիչ Աշոտ Վարդանյանի գլխավորությամբ:

Քննիչի հանձնարարականով, դեպքի վայր է հրավիրվել դատական բժիշկը:

Ոստիկանության Մաշտոցի բաժնի օպերատիվ խումբը օպերատիվ-քննչական գործողությունների արդյունքում պարզել է, որ ինքնասպանություն գործած աղջիկը Երևան քաղաքի Ավան վարչական շրջանի Նարեկացի թաղամասի բնակիչ, 28-ամյա Յանա Մանասյանն էր:

Ֆոտոլրագրող Գագիկ Շամշյանը հայտնեց նաև, որ Կիևյան կամրջին հարակից` Հալաբյան փողոցում ոստիկանության Մաշտոցի բաժնի օպերատիվ խումբը հայտնաբերել է «Ֆոլկսվագեն» մակնիշի ավտոմեքենա, որը պատկանում էր ինքնասպանություն գործած աղջկան:

Ավտոմեքենան տեղափոխվել է ոստիկանության Մաշտոցի բաժնի տուգանային հրապարակ:

Լուսանկարները և տեսանյութը՝ Գագիկ Շամշյանի