ԱԺ պատգամավորները հանդիպել են ՆԱՏՕ-ի ԽՎ պատվիրակության հետ
Դիվանագիտական առաքելություններ
ՆԱՏՕ-ի Խորհրդարանական վեհաժողովում հայկական պատվիրակության ղեկավար Կորյուն Նահապետյանը, պատվիրակության անդամները և ԱԺ խմբակցությունների ներկայացուցիչները մարտի 27-ին հանդիպել են ՆԱՏՕ ԽՎ-ի քաղաքական հարցերի հանձնաժողովի նախագահ Ժոզե Լելլոյի գլխավորած պատվիրակության հետ: Ողջունելով հյուրերին՝ Կորյուն Նահապետյանը բարձր է գնահատել ՆԱՏՕ ԽՎ-ի հետ Ազգային ժողովի արդյունավետ համագործակցությունը ՀՀ զինված ուժերում ժողովրդավարական բարեփոխումների, քաղաքացիական վերահսկողության իրականացման առումով, կարևորել է միջազգային խաղաղապահ առաքելությանը ՀՀ զինված ուժերի մասնակցությունը և հույս հայտնել, որ Անհատական գործընկերության գործողությունների ծրագիրը շարունակական կլինի:
ՆԱՏՕ ԽՎ-ի քաղաքական հարցերի հանձնաժողովի նախագահ Ժոզե Լելլոն կարևորել է ՆԱՏՕ-Հայաստան համագործակցությունը, բարձր է գնահատել Հայաստանի ջանքերը ներպետական բարեփոխումների ու տարածաշրջանային անվտանգության գործում: Նրա տեղեկացմամբ՝ իրենց այցը երկրի իրավիճակին ու հնարավորություններին անմիջաբար ծանոթանալու նպատակ ունի, ինչը կամփոփվի մայիսին ՆԱՏՕ ԽՎ-ում ներկայացվելիք զեկույցում: Այդ նպատակով երկրի ղեկավար կազմի, տարբեր կազմակերպությունների ներկայացուցիչների ու փորձագետների հետ բազմաթիվ հանդիպումներ են նախատեսվում: Նրա գնահատմամբ ՝ իրենք ընկալումով են մոտենում Հայաստանի արտաքին քաղաքական առաջնահերթություններին՝ պայմանավորված աշխարհաքաղաքական իրավիճակով և տարածաշրջանային զգայուն խնդիրներով, և փորձում աջակցել Հայաստանին:
Հանդիպման ժամանակ քննարկվել են միջազգային անվտանգությանը, այդ հարցում ՆԱՏՕ-ի դերակատարությանը, տարածաշրջանային անվտանգության գործում Հայաստանի խաղաղարար ջանքերին և պաշտպանության ոլորտի խորհրդարանական օրակարգին առնչվող հարցեր: Այս համատեքստում հայ խորհրդարանականները կարևորել են Մինսկի խմբի շրջանակներում ԼՂ հիմնախնդրի խաղաղ կարգավորման գործընթացը, անդրադարձել տարածաշրջանային անվտանգության և Հայաստանի շրջափակման խնդիրներին և մտահոգություն են հայտնել սիրիական հայաբնակ Քեսաբ բնակավայրում տեղի ունեցող իրադարձությունների վերաբերյալ:
Հանդիպման ժամանակ քննարկվել են նաև փոխադարձ հետաքրքրություն ներկայացնող այլ հարցեր:
ՈՒՂԻՂ ԵԹԵՐ
Ամենադիտված 
Դերասանուհու որդին հիվանդանոցում մահացել է. որն էր եղել վեճի բուն պատճառը, ինչու էին կրակել նրան
