Նաիրա Զոհրաբյանը ԵԽԽՎ-ում առաջարկել է ուժեղացնել պայքարը քայքայիչ աղանդների դեմ

ԵԽԽՎ-ն երեկ' ապրիլի 10-ի ուշ երեկոյան, քննարկել է քայքայիչ աղանդների և դրանց դեմ պայքարի նախագիծը: ԵԽԽՎ հայկական պատվիրակության անդամ Նաիրա Զոհրաբյանը խոսել է քայքայիչ աղանդների և դրանց կործանարար հետևանքների մասին, հատկապես' անչափահասների շրջանում: Պատգամավորն առաջարկել է, որպեսզի ԵԽԽՎ-ն հանձնարարի ազգային խորհրդարաններին խստացնել օրենսդրությունն անչափահասներին քայքայիչ աղանդների մեջ ներքաշելու հետ կապված' նշելով, որ պետք է գտնել ճիշտ հավասարակշռությունը մարդու հիմնարար իրավունքների և կրոնի ազատության դեպքում:

«Հարգելի գործընկերներ, քանի ընտանիք պիտի կործանվեր, քանի անչափահաս պիտի կործանվեր, որպեսզի մեր Վեհաժողովը վերջապես անդրադառնար քայքայիչ աղանդներին և նրանց կործանարար հետևանքներին: Ես ողջունում եմ մեր գործընկերոջ' Ռուդի Սալեսի ներկայացրած զեկույցը, և լինեմ անկեղծ' այն համարում եմ շատ ուշացած: Երկու տարի առաջ, ես' որպես Հայաստանի խորհրդարանի պատգամավոր, իմ մի քանի գործընկերների հետ մեր խորհրդարանում նմանօրինակ նախագիծ ներկայացրեցի, որը տալիս էր «հոգեորսության» սահմանումը և որը հնարավորություն կտար օրենքի ուժով մեր քաղաքացիներին, անչափահասներին պաշտպանել վտանգավոր աղանդներից: Այն ժամանակ, սակայն, մեր հարգարժան Վենետիկի հանձնաժողովն անասելի աղմուկ բարձրացրեց մեր նախագծի շուրջ' այն համարելով խղճի ազատության ոտնահարում: Այսօր մեր գործընկերը շատ ավելի խիստ շեշտադրումներով և աղանդների դեմ պայքարի շատ ավելի խիստ պահանջներով նախագիծ է ներկայացրել, և դա միանգամայն ողջունելի է:

Եթե մենք խոսում ենք մարդու իրավունքներից ու չենք պայքարում այն աղանդների դեմ, որոնք մարդուն դարձնում են շատ դեպքերում ստրուկ' ոտնահարելով նրա ցանկացած իրավունք, ապա մենք ուղղակի զբաղվում ենք երեսպաշտությամբ: Մենք ուղղակի պարտավոր ենք կասեցնել վտանգավոր, ավերիչ աղանդների շքերթը մեր երկրներում, որոնք շատ դեպքերում, օգտվելով մարդկանց սոցիալական ծայրահեղ վիճակից, ընտանիքներին, անչափահասներին տանում են դեպի երաշխավորված կործանում: Միանգամայն համաձայն եմ զեկուցողի հետ, որ պետք է ուժեղացնել քրեական օրենսդրության այն դրույթները, որոնք պ ատիժ են նախատեսում մարդկանց և առաջին հերթին անչափահասներին տարբեր ֆիզիկական և հոգեբանական ազդեցությունների միջոցով այս կամ այն աղանդից կախյալ դարձնելը: Նույնը, ի դեպ, շատ ավելի մեղմ շեշտադրումներով, առաջարկում էինք ես և իմ գործընկերները, սակայն Եվրոպայի խորհրդից այն ժամանակ եկած «դատավիճռը» կասկածելիորեն լիբերալ էր քայքայիչ աղանդների դեմ:

Ես հույս ունեմ, որ այսօր իրավիճակ է փոխվել, տեսնելով, թե ինչ ավերածություններ են անում նմանօրինակ աղանդները: Երբ քաղաքացու, անչափահասի շահերը վտանգված են, անհրաժեշտ է գտնել ճիշտ հավասարակշռություն մարդու հիմնարար արժեքների և կրոնի ազատության միջև: Ես կոչ եմ անում կողմ քվեարկել այս շատ կարևոր զեկույցին և կոչ անել ազգային խորհրդարաններին' անհապաղ ձեռնամուխ լինել քայքայիչ աղանդների դեմ պայքարի լրջագույն օրենսդրության մշակմանը»,-իր ելույթում ասել է հայաստանյան պատվիրակը: