ԱԺ պատվիրակությունը Սանկտ Պետերբուրգում մասնակցել է ԱՊՀ ՄԽՎ և ՀԱՊԿ ԽՎ աշխատանքներին

ՀՀ ԱԺ պատվիրակությունը ԱԺ փոխնախագահ Հերմինե Նաղդալյանի գլխավորությամբ` ապրիլի 16-18-ը Սանկտ Պետերբուրգում մասնակցել է ԱՊՀ ՄԽՎ Խորհրդի լիագումար և հանձնաժողովների նիստերին, ինչպես նաև ՀԱՊԿ ԽՎ-ի Խորհրդի և հանձնաժողովների նիստերին: Ապրիլի 17-ին ՌԴ Պետական դումայի նախագահ Սերգեյ Նարիշկինի նախագահությամբ տեղի է ունեցել «Եվրասիական տնտեսական հեռանկար» միջազգային համաժողովը, որտեղ ելույթով հանդես է եկռլ ԱԺ փոխնախագահ Հերմինե Նաղդալյանը: Նա նշել է, որ նման ձևաչափով քննարկումները կարող են հանդիսանալ ինտեգրացիոն գործընթացների խորացման հետագա քայլերի մշակման համար կարևոր հարթակ: Տիկին Նաղդալյանը նշել է նաև, որ համաժողովն իր ուրույն դերը կունենա իշխանությունների, գործարար հատվածի, փորձագետների միջև կառուցողական երկխոսություն ձևավորելու գործում:

Նույն օրը տեղի է ունեցել ԱՊՀ ՄԽՎ քաղաքական հարցերի և միջազգային համագործակցության հարցերի մշտական հանձնաժողովի և ՀԱՊԿ ԽՎ Խորհրդի նիստերը: ՀԱՊԿ ԽՎ Խորհրդի նիստում հայկական կողմի առաջարկով օրակարգ էր ընդգրկվել հյուսիս-արևմտյան Սիրիայում իրավիճակի սրման վերաբերյալ ՀԱՊԿ ԽՎ Խորհրդի հայտարարությունը, որը ընդունվել է: Խորհրդի նիստում քննարկել են նաև մի շարք կարևոր հարցեր, ամփոփվել են ՀԱՊԿ ԽՎ ձմեռային նստաշրջանի արդյունքները, ընդունվել են օրակարգում ընդգրկված բոլոր հարցերը:

ՀԱՊԿ Խորհրդի հաջորդ նիստին կքննարկվի հայկական կողմի ներկայացրած' ՀԱՊԿ պատասխանատվության հարակից գոտիներում Հարավային Կովկասի իրավիճակի վերաբերյալ հայտարարության նախագիծը: Նիստի ավարտին հայկական կողմն առաջարկել է ՀԱՊԿ ԽՎ Խորհրդի հաջորդ նիստն անցկացնել 2014թ.-ի նոյեմբերին Երևանում:

Խորհրդի նիստի ավարտից հետո տեղի է ունեցել մամուլի ասուլիս՝ ԱԺ փոխնախագահ Հերմինե Նաղդալյանի, պատգամավոր Խոսրով Հարությունյանի և ԱՊՀ ՄԽՎ-ում ՀՀ ԱԺ ներկայացուցիչ Հայկ Չիլինգարյանի մասնակցությամբ: Հայկական պատվիրակությունը պատասխանել է լրագրողների հարցերին, որոնք հիմնականում վերաբերել են Հայասատանի՝ ՄՄ-ին միանալու որոշմանը:

Նույն օրը տեղի է ունեցել նաև ԱՊՀ ՄԽՎ պաշտպանության և անվտանգության հարցերի հանձնաժողովի հարցերի նիստը, որին մասնակցել է ԱԺ պատգամավոր Ռուբիկ Հակոբյանը:

Օրվա երկրորդ կեսին ԱՊՀ ՄԽՎ Խորհրդի նախագահ Վալենտինա Մատվիենկոյի գլխավորությամբ տեղի է ունեցել ԱՊՀ ՄԽՎ Խորհրդի նիստը, որի ընթացքում քննարկվել են Հայրենական Մեծ պատերազմի 70-ամյակին նվիրված միջոցառումների ծրագիրը, ԱՊՀ ՄԽՎ շրջանակներում օրենսդրական դաշտի միասնականացմանը, ինչպես նաև մշակութային ոլորտին վերաբերող հարցեր: Նիստի սկզբում Հերմինե Նաղդալյանը փոխանցել է Հովիկ Աբրահամյանի շնորհակալությունը տիկին Մատվիենկոյին և մյուս գործընկերներին արդյունավետ համագործակցության համար:

Նիստի ընթացքում տիկին Նաղդալյանն առաջարկել է հաջորդ նիստում լրացում կատարել ԱՊՀ ՄԽՎ քարտուղարության կարգավիճակի մասին փաստաթղթում, ինչը տիկին Մատվիենկոն ողջունել է:

Ապրիլի 18-ին տեղի է ունեցել նաև ԱՊՀ ՄԽՎ 40-րդ լիագումար նիստը:

Սանկտ Պետերբուրգում տեղի են ունեցել նաև Երիտասարդական ՄԽՎ մի շարք միջոցառումներ: Ապրիլի 17-ին տեղի է ունեցել Երիտասարդական ՄԽՎ 3-րդ նիստը, որի կարևոր հարցերից է եղել նախագահության փոխանցումը Հայաստանին: Երիտասարդական ՄԽՎ-ում Հայաստանի համակարգողն է ԱԺ պատգամավոր Արփինե Հովհաննիսյանը: