ՄԱԿ-ի Տնտեսական, սոցիալական և մշակութային իրավունքների կոմիտեում քննարկվել են Հայաստանի 2-րդ և 3-րդ պարբերական զեկույցները

Ժնևում ՄԱԿ-ի Տնտեսական, սոցիալական և մշակութային իրավունքների կոմիտեն իր 52-րդ նստաշրջանի ընթացքում մայիսի 7-ին քննարկել է Հայաստանի 2-րդ և 3-րդ պարբերական զեկույցները ՄԱԿ-ի Տնտեսական, սոցիալական և մշակութային իրավունքների Միջազգային դաշնագրի իրականացման վերաբերյալ: ՀՀ պատվիրակության կազմում, որը ղեկավարել է ՀՀ ԱԳ նախարարի տեղակալ Աշոտ Հովակիմյանը, ընդգրկված են եղել Արդարադատության նախարարի տեղակալ Եղիշե Կիրակոսյանը, աշխատանքի և սոցիալական հարցերի նախարարի տեղակալ Ջեմմա Բաղդասարյանը, արտաքին գործերի, էկոնոմիկայի, կրթության և գիտության, առողջապահության նախարարությունների, ինչպես նաև դատական դեպարտամենտի ներկայացուցիչները:

Զեկույցի քննարկումն անցել է կառուցողական երկխոսության մթնոլորտում' կոմիտեի կողմից առաջարկված թեմատիկ հարցերի շրջանակում: ՀՀ պատվիրակության ղեկավարը ներկայացրել է զեկույցը, ՄԱԿ-ի Տնտեսական, սոցիալական և մշակութային իրավունքների Միջազգային դաշնագրի շրջանակներում ՀՀ ստանձնած պարտավորությունների կատարման ընթացքը' օրենսդրական և պրակտիկայում արձանագրված բարեփոխումները, Հայաստանի Հանրապետության կողմից ձեռնարկված և նախատեսվող քայլերը:

Զեկույցի քննարկման ընթացքում Հայաստանի պատվիրակությունը պատասխանել է կոմիտեի անդամների կողմից բարձրացված հարցերին, մասնավորապես, ներկայացնելով դաշնագրի իրականացման սահմանադրական և իրավական շրջանակները, երկրում տնտեսական, սոցիալական և մշակութային իրավունքների պաշտպանման և խթանման ուղղությամբ կառավարության կողմից իրականացվող աշխատանքը:

Մայիսի 23-ին կհրապարակվեն Կոմիտեի կողմից ընդունված եզրակացություններն և առաջարկությունները: