Արտակ Զաքարյանն ու ԵԺԿ անդամները քննարկել են ՀՀ-ԵՄ համագործակցության հեռանկարներին վերաբերող հարցեր

ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը մայիսի 21-ին հանդիպել է Եվրոպայի ժողովրդական կուսակցության (ԵԺԿ) արտաքին կապերի քարտուղար Նիկոլա Բրիեքի և ԵԺԿ-ի քաղաքական խորհրդատու Բեատրիս դե Անտա դե Բենիտոյի հետ: Հանդիպման ընթացքում կողմերը քննարկել են ՀՀ արտաքին քաղաքականությանն առնչվող մի շարք խնդիրներ, մասնավորապես, ՀՀ-ԵՄ համագործակցության հեռանկարներին վերաբերող հարցեր: Արտակ Զաքարյանը հույս է հայտնել, որ Եվրախորհրդարանի ընտրություններից հետո հնարավոր կլինի գործնականում առաջ տանել ՀՀ-ԵՄ համագործակցության փոխադարձ հետաքրքրություն ունեցող խնդիրները, խորացնել համագործակցության ոլորտները, ինչպես նաև զարգացնել քաղաքական և միջկուսակցական հարաբերությունները:

Նիկոլաս Բրիեքը Զաքարյանի խնդրանքով մանրամասն ներկայացրել է նախընտրական զարգացումները Եվրախորհրդարանի ընտրություններում: Անդրադարձ է կատարվել Արևելյան գործընկերության շրջանակներում փոխգործակցությանը, մասնավորապես Եվրանեսթ ԽՎ-ում Հայաստանի հետագա դիրքորոշումներին:

Արտակ Զաքարյանը ներկայացրել է Հայաստանի՝ Եվրասիական տնտեսական միությանն անդամակցելու գործընթացը, այդ հարցում Հայաստանի ակնկալիքները, ՌԴ-ի հետ ռազմավարական համագործակցության հեռանկարները: Կողմերը խոսել են ԼՂ-ի շուրջ ընթացող զարգացումների և դրանով պայմանավորված տարածաշրջանային խնդիրների մասին: Անդրադարձ է կատարվել ներքաղաքական մի շարք հարցերի, մասնավորապես, նորաստեղծ կառավարության գործունեությանը: Զրուցակիցներն անդրադարձել են նաև Ուկրաինայի շուրջ տեղի ունեցող զարգացումներին: Պարոն Զաքարյանը հույս է հայտնել, որ Ուկրաինայում իրադրությունը կկայունանա նախագահական ընտրություններից հետո, ինչը հնարավորություն կտա զարգացումները հնարավորինս կանխատեսելի դարձնելու: