Գալուստ Սահակյանն ընդունել է Հայաստանում Ճապոնիայի արտակարգ և լիազոր դեսպանին

ՀՀ ԱԺ նախագահ Գալուստ Սահակյանը հունիսի 10-ին ընդունել է ՀՀ-ում Ճապոնիայի արտակարգ և լիազոր դեսպան Չիկահիտո Հարադային: Հանդիպմանը ներկա են եղել Հայաստան-Ճապոնիա բարեկամական խմբի ղեկավար Սամվել Ֆարմանյանը, ԱԺ գլխավոր քարտուղար Հրայր Թովմասյանը: ԱԺ նախագահը կարևորել է Ճապոնիայի հետ երկկողմ հարաբերությունների հետագա զարգացումը՝ անհրաժեշտ համարելով քաղաքական, տնտեսական, մշակութային և այլ ոլորտներում փոխշահավետ համագործակցության ակտիվացումը և ընդլայնումը:

Գալուստ Սահակյանի խոսքով, Հայաստանի և Ճապոնիայի միջև միջպետական հարաբերությունների ամրապնդման և հայ-ճապոնական համագործակցության հետագա զարգացման գործում մեծ նշանակություն ունեցան ՀՀ Նախագահ Սերժ Սարգսյանի` Ճապոնիա կատարած պաշտոնական այցի շրջանակում տեղի ունեցած հանդիպումները և ձեռքբերված պայմանավորվածությունները: Երկու երկրների միջև քաղաքական երկխոսությունը զարգացնելու գործում ԱԺ նախագահը կարևոր դեր վերապահելով խորհրդարանական համագործակցությանը` ընդգծել է խորհրդարանական բարեկամության խմբերի գործունեությունը: ԱԺ նախագահը կարևորել է 2015թ. Երևանում դեսպանատուն բացելու Ճապոնիայի կառավարության որոշումը՝ նշելով, որ այն կխթանի երկկողմ հարաբերությունների հետագա խորացումը: Նա ողջունել է Հայաստանում «Խաղաղության հուշաքարի» տեղադրման գաղափարը, որի բացման արարողությունը նախատեսվում է անցկացնել հունիսի 25-ին:

Շնորհավորելով Գալուստ Սահակյանին ԱԺ նախագահ ընտրվելու կապակցությամբ՝ դեսպանը նշել է, որ Ճապոնիան կարևորում է Հայաստանի հետ բազմակողմ հարաբերությունների զարգացումը, ինչին կնպաստի նաև միջխորհրդարանական համագործակցության խորացումը: Երկկողմ հարաբերությունների ամրապնդման գործում նա նույնպես բարձր է գնահատել Նախագահ Սարգսյանի պաշտոնական այցը Ճապոնիա:

Երկուստեք կարևորվել է Հայաստանի և Ճապոնիայի արդյունավետ համագործակցությունը միջազգային կազմակերպությունների շրջանակներում: ԱԺ նախագահը բարձր է գնահատել Ճապոնիայի հավասարակշռված դիրքորոշումը ԼՂ հակամարտության կարգավորման հարցում: Հանդիպման ընթացքում քննարկվել են երկկողմ հետաքրքրություն ներկայացնող այլ հարցեր ևս: