Սերժ Սարգսյանը ժամանել է Թբիլիսի

Հայաստանի նախագահ Սերժ Սարգսյանը հունիսի 18-ին երկօրյա պաշտոնական այցով ժամանել է Վրաստան, որտեղ մի շարք հանդիպումներ կանցկացնի հանրապետության բարձրաստիճան անձանց հետո, տեղեկացնում է «Նովոստի Գրուզիան»:

Հայաստանի պատվիրակությանը փոխադրող ինքնաթիռը Թբիլիսիի միջազգային օդանավակայանում վայրէջք է կատարել տեղական ժամանակով ժամը 13:00-ին: Օդանավակայանում հյուրերին դիմավորել է Վրաստանի արտաքին գործերի նախարար Մայա Փանջիկիձեն և հանրապետության Անվտանգության խորհրդի ղեկավար Իրինա Իմերլիշվիլին:

Այսօր Թբիլիսիի Հավլաբարի շրջանի նախագահական պալատում տեղի կունենա Սերժ Սարգսյանի դիմավորման հանդիսավոր արարողությունը: Վրաստանի և Հայաստանի նախագահների միջև դեմ առ դեմ ձևաչափով հանդիպումից հետո բանակցություններ կանցկացվեն ընդլայնված կազմով՝ երկու երկրների պատվիրակությունների մասնակցությամբ, այնուհետև երկու պետությունների ղեկավարները համատեղ հայտարարություն կանեն մամուլի համար:

Հունիսի 19-ի առավոտյան կկայանա ՀՀ նախագահի հանդիպումը Վրաստանի վարչապետ Իրակլի Ղարիբաշվիլիի հետ: Այն կանցկացվի աշխատանքային նախաճաշի ձևաչափով:

Նախատեսվում է, որ այսօր ավելի ուշ Վրաստանի ու Հայաստանի նախագահները Հերոսների հրապարակում ծաղկեպսակներ կդնեն Վրաստանի տարածքային ամբողջականության համար մարտերում զոհվածների հուշահամալիրին:

Հաղորդվում է, որ Հայաստանի նախագահը Վրաստանից կմեկնի հունիսի 19-ին: