ՌԴ արտաքին գործերի նախարար Սերգեյ Լավրովը կիրակի կայցելի Երևան

ՌԴ արտաքին գործերի նախարար Սերգեյ Լավրովը վաղը' հունիսի 22-ին, կայցելի Երևան: Այցի շրջանակներում նախատեսած է Հայաստանի և Ռուսաստանի արտգործնախարարների համատեղ մամուլի ասուլիսը: ՌԴ արտգործնախարարը կայցելի նաև Ծիծեռնակաբերդ, որտեղ հարգանքի տուրք կմատուցի Հայոց ցեղասպանության զոհերի հիշատակին:

«Արմենպրես»-ի հետ զրույցում ՌԴ ԱԳՆ տեղեկատվության և մամուլի բաժնի փոխտնօրեն Մարիա Զախարովան ասաց, որ այցի շրջանակնեում դաշնակից և ռազմավարական գործընկերների միջև փոխգործակցությանն զարգացման ուղղված երկխոսություն կլինի: Կողմերը հատուկ ուշադրություն կդարձնեն նախորդ տարի դեկտեմբերի 2-ին ՀՀ և ՌԴ նախագահների միջև ձեռք բերված պայմանավորվածությունների իրականացման փաստին:

«Այցի ընթացքում կանցկացվի, այսպես ասած, ժամացույցների ստուգում միջազգային և տարածաշրջանային քաղաքականության մեջ առկա արդիական հարցերի շուրջ: Մոսկվայի և Երևանի արտաքին քաղաքականության դիրքերն ավանդաբար համարվում են սերտ»,- նշեց Զախարովան' հավելելով, որ Մոսկվայում համոզված են, որ Սերգեյ Լավրովի այցը Հայաստան երկու երկրների միջև հարաբերությունների և փոխադարձ համագործակցության զարգացմանը նոր թափ կհաղորդի:

«Հայ-ռուսական բազմակողմ համագործակցությունն այսօր գտնվում է բարձր մակարդակի վրա: Ապրանքաշրջանառության տեմպերը բարձր են: 2013թ.-ին ապրանքաշրջանառությունը աճել է 10.6 տոկոսով և կազմել 1.35 միլիարդ դոլար: Ռուսաստանը վստահաբար Հայաստանի տնտեսության գլխավոր ներդնողն է. ընդհանուր կապիտալը կազմում է 3.2 միլիարդ դոլար: Հայկական շուկայում գործում է ռուսական կապիտալով 1,3 հազար ձեռնարկություն: Միջկառավարական հանձնաժողովներն ակտիվ համագործակցում են: Հաջողությամբ իրականացվում է մինչև 2020 թ. նախանշված երկարաժամկետ տնտեսական համագործակցության ծրագիրը»,- շեշտեց Մարիա Զախարովան' հավելելով, որ երկկողմ գործընկերության նոր մակարդակն անկասկած կնպաստի առաջիկայում Հայաստանի լիարժեք ներգրավմանը եվրասիական ինտեգրացիոն գործընթացներին:

Մինչ Երևան այցելությունը, հունիսի 17-18-ին Սերգեյ Լավրովը պաշտոնական այցով գտնվում էր Ադրբեջանում: Բաքվում Սերգեյ Լավրովն անդրադարձել էր ղարաբաղյան հակամարտության կարգավորմանը, նշելով, որ «Լեռնային Ղարաբաղի հարցը կապ չունի Եվրասիական տնտեսական ինտեգրման գործընթացների հետ, որոնք այժմ տեղի են ունենում Ռուսաստանի, Ղազախստանի և Բելառուսի միջև, և որոնց, համապատասխան փաստաթղթերի ստորագրումից հետո, շուտով կմիանա նաև Հայաստանը»: