«Մինչև այս տարվա վերջ կստեղծվեն ՀԱՊԿ-ի հավաքական ավիացիոն ուժեր». Բորդյուժա

Մինչև այս տարվա վերջ կստեղծվեն ՀԱՊԿ-ի ավիացիոն ուժեր, ինչպես նաև կազմակերպությունում կձևավորվեն կիբեռսպառնալիքների դեմ պայքարի հատուկ գործողությունների ուժեր: Այդ մասին հունիսի 25-ին ԲԵԼՏԱ գործակալությանը տված հարցազրույցում հայտարարել է Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան:

«Մենք հասկացանք, որ ՀԱՊԿ-ում ձևավորված ուժերի համար հարկավոր են գործողության անցկացման վայրեր դրանց փոխադրման միջոցներ: Ուստի ես նպատակահարմար եմ համարում ստեղծել ՀԱՊԿ-ի հավաքական ավիացիոն ուժեր… Կարծում եմ, որ այս տարվա ընթացքում մենք կավարտենք դրանց ձևավորումը»,-ասել է Բորդյուժան:

Խոսելով ՀԱՊԿ-ի հատուկ գործողությունների ուժերի մասին՝ գլխավոր քարտուղարը նշել է, որ այդ ստորաբաժանումները կոչված են հատուկ ձևերով ու մեթոդներով ապահովել աջակցությունը ՀԱՊԿ-ի այս կամ այն զինված կազմավորման գործունեությանը: «Դա միանգամայն անհրաժեշտ միջոցառում է ժամանակակից պատերազմի պայմաններում: Այդ հատուկ ստորաբաժանումները կարող են հակազդել կիբեռգրոհներին, հատուկ միջոցների օգտագործմամբ որսալ այս կամ այն ազդանշանները, տեղեկատվական հաղորդումները և այլն»,-նշել է Բորդյուժան:

Նրա խոսքով՝ պլանավորվում է, որ կլինեն մի ամբողջ շարք ստորաբաժանումներ, այդ թվում՝ տեղեկատվական-հոգեբանական գործողությունների ստորաբաժանում:

ՀԱՊԿ-ի գործունեության հիմնական ուղղությունները քաղաքական համագործակցության համակողմանի զարգացումն է, ռազմական բաղադրիչի զարգացումն ու կատարելագործումը, միջազգային ահաբեկչությանն ու ծայրահեղականությանը, թմրանյութերի, զենքի անօրինական շրջանառությանը և այլ սպառնալիքներին հակազդելը: Հավաքական անվտանգության մասին պայմանագիրը 1992 թվականի մայիսի 15-ին Տաշքենդում ստորագրվել է ԱՊՀ-ի մասնակից վեց պետությունների՝ Հայաստանի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի կողմից, հաղորդել է ՌԻԱ Նովոստին: