Նաիրա Զոհրաբյանն ընդունել է Հայաստանում Մեծ Բրիտանիայի դեսպան Քեթրին Լիչին

ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը հունիսի 30-ին հանդիպել է Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Քեթրին Լիչի հետ: Դեսպանին հետաքրքրել է Հայաստան-Եվրամիություն հարաբերությունների զարգացման օրակարգը, թե ինչ խնդիրներ է տեսնում հայկական կողմը, որոնք կարող են հիմք հանդիսանալ Հայաստան-ԵՄ երկխոսությունը շարունակելու համար:

Նաիրա Զոհրաբյանը ներկայացրել է Հայաստանի ներքաղաքական իրավիճակը՝ խոսելով Եվրասիական տնտեսական ինտեգրման գործընթացի և Հայաստան-ԵՄ հարաբերությունների շուրջ: Հանձնաժողովի նախագահը հույս է հայտնել, որ թե ԵՄ-ն, թե Հայաստանում եվրոպական օրակարգով հետաքրքրված քաղաքական ուժերը կանեն հնարավորը՝ Հայաստան-ԵՄ օրակարգը դինամիկ զագացնելու և շարունակելու համար:

Դեսպան Քեթրին Լիչը ողջունել է «Բարգավաճ Հայաստան» կուսակցության անդամակցումը Եվրոպայի պահպանողականների և ռեֆորմիստների մեծ ընտանիքին՝ հույս հայտնելով, որ ինչքան մեծ թվով հայաստանյան կուսակցություններ ինտեգրվեն եվրոպական մեծ ընտանիքներին, դրանից մեծապես կշահի Հայաստան-Եվրամիություն օրակարգը:

Կողմերը քննարկել են նաև ԱԺ ոչ իշխանական քառյակի գործունեությանը և հետագա քայլերին վերաբերող հարցեր, անդրադարձել ընտրական օրենսգրքի և մի շարք օրենքներում կատարված փոփոխություններին, ինչպես նաև սահմանադրական բարեփոխումների հայեցակարգին: