Ադրբեջանին չի հաջողվում հանրությունից թաքցնել բանակում իր կորուստները. ևս 3 զոհ, 2 վիրավոր

Չնայած Ադրբեջանի առաջնորդ Իլհամ Ալիևի հրամանագրով այդ երկրում կասեցվել է սեփական զինուժին վերաբերող ցանկացած բացասական, առավել ևս' շփման գծում ձախողումներին վերաբերող տեղեկատվության հրապարակում՝ այդուհանդերձ, այդ երկրի մամուլ նոր տեղեկություններ են թափանցել վերջին օրերին ադրբեջանական բանակի կրած կորուստների մասին:

Ինչպես հաղորդում է «Արմենպրես»-ը, ադրբեջանական Meydan TV հեռուստաալիքի կայքը հայտնել է, որ Ադրբեջանի բանակի 3 զինվոր զոհվել և 2-ը վիրավորվել են Գեդաբեկի ուղղությամբ տեղակայված զորամասերից մեկում' իբրև թե «հակառակորդի իրագործած գործողության» արդյունքում:

Meydan TV-ին հայտնում է, որ Facebook-ի իր էջում այսպիսի գրառում է կատարել Գերմանիայում բնակվող բլոգեր Հաբիբ Մունթազիրը: Նա նշել է նաև զոհված զինծառայողների անունները' Զաքաթալայի շրջանից Էլշան Էֆենդիև, Դևեչիի շրջանից ենթասպա Սանան Իսաև և Հաջիգաբուլի շրջանից զինվոր Վյուգար Գասըմով. նրանք զոհվել են հունվարի 24-ին: Վիրավորվել են կապիտան Իլգար Ասադովը և ենթասպա Անար Ալիևը, որոնք տեղափոխվել են զինվորական հոսպիտալ: Հ.Մունթազիրը նշել է, որ զոհվածները հողին են հանձնվել հունվարի 25-ին:

Հ. Մունթազիրն իր բլոգում գրառել է. «Հուղարկավորության մասնակիցներին խստորեն հանձնարարվել է բջջայինով և այլ միջոցներով լուսանկարներ չանել: Պաշտպանության նախարարությունը հասարակությունից թաքցնում է բոլոր այս լուրերը: Ճակատային գոտում արդեն մի քանի օր է' իրադրությունը շատ վատ է»:

Meydan TV հեռուստաալիքը փորձել է այդ առնչությամբ պարզաբանումներ ստանալ Ադրբեջանի ՊՆ մամուլի ծառայության ղեկավար Դերգահլըից, սակայն, վերջինս չի պատասխանել հեռուստաալիքի հեռախոսազանգերին:

Զոհված ենթասպա Սանան Իսաևի քրոջ ամուսինը' Սադիգ Ալիևը հեռուստաալիքի հետ զրույցում հաստատել է փաստը: Նա հայտնել է, որ 33-ամյա Սանան Իսաևի զոհվելու մասին տեղեկացել են հունվարի 24-ին, որին հունվարի 25-ին հուղարկավորել են Դևեչիի շրջանի Աղդաշ գյուղում:

Facebook-ի իր էջում «Զաքաթալա Ազերբայջան» էջը տեղադրել է զոհված Էլշան Էֆենդիևի լուսանկարը և արել հետևյալ գրառումը. «Զաքաթալայի շրջանի Յուխարը Չարդախլար գյուղի բնակիչ Էֆենդիև Էլշան Էլչին օղլուն զոհվել է զինծառայությունը կատարելու ժամանակ: Նա կրում էր հայրենիքի համար զոհված իր քեռու' Էլշանի անունը»:

Անունը հրապարակել չցանկացած մի աղբյուր Meydan TV-ին տեղեկացրել է հունվարի 23-ին Նիզամի Շամիլ օղլու Բաբաշովի զոհվելու մասին:

Հունվարի 23-ին ադրբեջանական Qafqazinfo լրատվական կայքը՝ հղում կատարելով Ադրբեջանի պաշտպանության նախարարությանը, հայտնել էր, որ պայմանագրային 26-ամյա զինծառայող Ֆիզուլիի շրջանի Արազ-Զարգար գյուղի բնակիչ Նիզամի Շամիլ օղլու Բաբաշովը զոհվել է ինքնաձիգից «անզգուշաբար կրակ բացվելու» հետևանքով:

ԼՂՀ ՊԲ-ն հայտնել էր, որ իր տրամադրության տակ եղած միջոցների կիրառմամբ պարզվել է, որ վերջին մեկ շաբաթվա ընթացքում նախահարձակ հակառակորդը' ղարաբաղյան ուժերի կողմից ձեռնարկված կանխարգելիչ գործողությունների արդյունքում տվել է առնվազը 15 զոհ և 20-ից ավելի վիրավոր, կորցրել է մեկ հրամանատարական և մեկ զինվորներ տեղափոխող «Սադկո» տիպի մարդատար ավտոմեքենա:

Այսպիսով' 2015 թվականի առաջին օրերից մինչ այժմ ՀՀ և ԼՂՀ սահմանների վրա ադրբեջանական բանակի իրագործած դիվերսիոն գործողությունների արդյունքում Ադրբեջանի զինված ուժերը նվազագույնը 28 զինծառայող են կորցրել և տվել առնվազը 27 վիրավոր: