Վրաստանի, Թուրքիայի և Ադրբեջանի էկոնոմիկայի նախարարները կհանդիպեն Թբիլիսիում

Վրաստանի, Թուրքիայի և Ադրբեջանի էկոնոմիկայի նախարարները մարտի 6-ին կհանդիպեն Թբիլիսիում: Այս մասին, ինչպես հաղորդում է «Արմենպրես»-ը' վկայակոչելով «Ինտերֆաքս-Ազերբայջան» լրատվական գործակալությունը, այցով Ադրբեջանում գտնվող Թուրքիայի էկոնոմիկայի նախարար Նիհաթ Զեյբեքչին լրագրողներին հայտարարել է Բաքվում կազմակերպված մամուլի ասուլիսի ժամանակ:

«Շուտով Թուրքիայի, Իրանի և Ադրբեջանի էկոնոմիկայի նախարարները կրկին կհանդիպեն Թավրիզում (Իրան), իսկ հետո Թուրքիայի, Թուրքմենստանի, Ղազախստանի, Ադրբեջանի էկոնոմիկայի նախարարների հանդիպում տեղի կունենա, հնարավոր է, Թուրքմենբաշիում», -ասել է Զեյբեքչին:

Խոսելով տարածաշրջանային համագործակցության մասին՝ թուրք նախարարը նշել է, որ այդ բանակցություններին զուգահեռ ծրագրվում են հանդիպումներ Թուրքիայի և Ռուսաստանի էկոնոմիկայի նախարարների միջև:

«Անատոլու» լրատվական գործակալությունը հայտնել է, որ հունվարի 29-ին Աշխաբադում հանդիպել են Թուրքիայի, Ադրբեջանի և Թուրքմենստանի արտաքին գործերի նախարարները: Հանդիպման ժամանակ քաղաքական ոլորտում համագործակցության հարցերին զուգահեռ քննարկվել են նաև տարածաշրջանային նախագծեր էներգետիկայի և տրանսպորտի ոլորտներում: Ադրբեջանական ԶԼՄ-ները հայտնել էին, որ Ադրբեջանն ու Թուրքիան ցանկանում են համոզել Թուրքմենստանին և Իրանին իրենց գազը Անդրանատոլիական գազային նախագծով (TANAP) կառուցվելիք ադրբեջանական խողովակաշարով փոխադրել Թուրքիա:

Թուրքական «Ենի Շաֆագ» թերթն ավելի վաղ հայտնել էր, որ Ադրբեջանն ու Թուրքիան ծրագրում են ստեղծել Եվրասիական էներգամիություն, որի կենտրոնը պետք է լինի Ստամբուլը: Էներգետիկ միությունը միավորելու է 18 երկրների, որը պետք է գլխավորեն Թուրքիան և Ադրբեջանը: