Բաքվում Իրանի դեսպանը մտահոգություն է հայտնել հայ-ադրբեջանական սահմանում հրադադարի ռեժիմի խախտումների առթիվ

Ադրբեջանում Իրանի Իսլամական Հանրապետության դեսպան Մոհսեն Փաքայինը մտահոգություն է հայտնել Ադրբեջանի հետ Հայաստանի և Լեռնային Ղարաբաղի Հանրապետության սահմաններում հրադադարի խախտումների առնչությամբ և կրկին հայտարարել, որ ԼՂ հակամարտության ռազմական ճանապարհով լուծումն անհնար է:

«Շատ ենք ափսոսում, որ հակամարտությունը շարունակվում է արդեն 20 տարի և դեռ չի կարգավորվել: Մենք անհանգստացած ենք սահմանում հրադադարի խախտման փաստից: Կարծում ենք, որ այդ հակամարտության լուծումը ռազմական ճանապարհով անհնար է: Պատերազմը կապակայունացնի տարածաշրջանը: Իրանը ողջունում է երկու երկրների միջև ընթացող բանակցությունները», -ասել է իրանցի դեսպանը ադրբեջանական «525-րդ» թերթի հետ զրույցում:

Դեսպան Փաքայինը կարևորել է ԼՂ հիմնադխնդրի լուծման ուղղությամբ ԵԱՀԿ Մինսկի խմբի գործունեությունը:

«Ակնկալում ենք, որ Մինսկի խմբի խմբի անդամները ավելի գործուն քայլեր կձեռնարկեն ԼՂ հակամարտության կարգավորման հարցում: Կարծում ենք, որ եթե տարածաշրջանի երկրները լուրջ համագործակցեն միմյանց հետ, ապա այս հարցում կարող են ավելի լավ արդյունքի հասնել», -ասել է նա' շեշտելով, որ «ամեն դեպքում' ԼՂ հակամարտությունը պետք է լուծվի խաղաղ ճանապարհով»: