Ադրբեջանի ՊՆ-ն չի վճարում ղարաբաղյան պատերազմի հաշմանդամների և զոհվածների սոցիալական հատկացումները

Ղարաբաղյան պատերազմի ադրբեջանցի հաշմանդամները և զոհվածների (շեհիդների) ընտանիքները չեն կարողանում ստանալ իրենց հասանելիք սոցիալական վճարումները, ինչի պատճառով նրանք պատրաստվում են բողոքի ակցիա անցկացնել:

Այս մասին, ինչպես հաղորդում է «Արմենպրես»-ը, virtualaz.org լրատվական կայքին հայտնել է «Հայրենական պատերազմի հաշմանդամներ» կազմակերպության նախագահ առաջին կարգի հաշմանդամ Ֆիրիդուն Մամեդովը' նշելով, որ իրենք այդ առնչությամբ արդեն ստորագրահավաք են սկսել:

«Շեհիդների ընտանիքները տարիներով չեն կարողանում ստանալ իրենց հարազատի զոհվելու համար հասանելիք փոխհատուցումը: Փոխհատուցման չափը զոհվածների համար կազմում է ընդամենը 11 հազար մանաթ (մոտ 11 հազար եվրո), իսկ ղարաբաղյան պատերազմի առաջին, երկրորդ և երրորդ կարգի հաշմանդամների համար' համապատասխանաբար 8800, 6600 և 4400 մանաթ, բայց կառավարությունը չի ցանկանում վճարել այդ գումարները»,- բողոքել է նա:

Մամեդովը նշել է, որ անցյալ տարվա ակցիաների ժամանակ միտինգավորներին խոստացել էին կարճ ժամանակում վճարել այդ փողերը, բայց դա մինչ օրս չի արվել:

Մամեդովն ասել է, որ զոհվածների ընտանիքներին և ղարաբաղյան հաշմանդամներին պետության կողմից ցուցաբերվող անտարբեր վերաբերմունքից դժգոհների մեջ կան մեծ թվով քաղաքացիներ, ովքեր ցանկանում են հրաժարվել Ադրբեջանի քաղաքացիությունից:

Նրա խոսքով' ներկայումս Ադրբեջանում 13500 զոհվածի ընտանիքներ և ղարաբաղյան պատերազմի 11 հազար հաշմանդամ կա, որոնք 1994 թվականից սկսած չեն կարողանում ստանալ իրենց հասանելիք գումարները:

«Ղարաբաղյան հաշմանդամների մեջ ապրուստի փողից զուրկ, բուժման կարիք ունեցող մեծ թվով քաղաքացիներ կան: Այդ մարդկանց ընտանիքներն ապահովված չեն անհրաժեշտ ապրուստով... Պետության կողմից այդ անտարբերությունն առաջացնում է նրանց խիստ դժգոհությունը»,- նշել է Մամեդովը:

Կայքը հայտնում է, որ 1990-ականների սկզբին զինծառայության կանչված քաղաքացիներն Ադրբեջանի զինված ուժերում ծառայությունն սկսելու պահից պարտադիր կերպով ապահովագրվել են պետության կողմից, ինչի համար կառավարութունը «Ազերսըղորթա» պետական ապահովագրական ընկերության հաշվին փող է փոխանցել:

Ադրբեջանի սահմանադրական դատարանը 2014 թվականի հունվարի 28-ին զինծառայողներին հատկացված պարտադիր ապահովագրության վճարումների հետ կապված վճիռ է ընդունել: Այդ փաստաթղթի հիման վրա Ադրբեջանի խորհրդարանը պետք է համապատասխան որոշում ընդուներ, ինչը չի արվել: Ղարաբաղյան հաշմանդամները և զոհվածների ընտանիքները վճռական են բողոքի ակցիաներ անցկացնելու մեջ' մինչև հասանելիք գումարներն ստանալը:

Կայքը նաև հայտնել է, որ 2000 զոհվածների ընտանիքների և Ղարաբաղի հաշմանդամներին ապահովագրական վճարներ կատարելու վերաբերյալ դատարանի վճիռներ կան հրապարակված:

Նշված փաստերը մեկ անգամ ևս ապացուցում են, որ նավթադոլարներով արբած Ադրբեջանի իշխանությունների համար ղարաբաղյան պատերազմի շեհիդներն ու հաշմանդամները որևէ կարևորություն չունեն:

Ադրբեջանական կողմը երկրի նախագահի 2014 թվականի սեպտեմբերի 24-ի «Հայաստանի Հանրապետության և Ադրբեջանի Հանրապետության զորքերի շփման գծում անվտանգության մի շարք կանոնների վերաբերյալ» հրամանագրից հետո լիովին կասեցրել է զինուժին վերաբերող ցանկացած բացասական տեղեկատվության հրապարակումը: Այդուհանդերձ, Լեռնային Ղարաբաղի Հանրապետության ՊԲ և ՀՀ ՊՆ տրամադրության տակ եղած միջոցների կիրառմամբ պարզվել է, որ նշված ժամանակահատվածում հայկական ուժերի կողմից ձեռնարկված կանխարգելիչ գործողությունների արդյունքում նախահարձակ հակառակորդը 2015 թվականի սկզբից մինչ այժմ տվել է առնվազն 30-ից ավելի զոհ և 27-ից ավելի վիրավոր: