Երևանից հետո Մինսկի խմբի համանախագահները կայցելեն Ստեփանակերտ

ԵԱՀԿ Մինսկի խմբի համանախագահները Բաքու և Երևան այցելությունից հետո կմեկնեն Ստեփանակերտ և հանդիպում կունենան ԼՂՀ նախագահ Բակո Սահակյանի և արտաքին գործերի նախարար Կարեն Միրզոյանի հետ: «Արմենպրես»-ի հետ զրույցում ԼՂՀ նախագահի մամուլի խոսնակ Դավիթ Բաբայանն ասաց, որ Արցախում սպասում են համանախագահների այցին:

«Համանախագահները գրեթե միշտ այցելում են Ստեփանակերտ: Բացառիկ դեպքեր են եղել, երբ համանախագահները Ստեփանակերտ չեն այցելել: Դա կամ պայմանավորված է եղել եղանակային պայմաններով կամ էլ համանախագահները տարածաշրջան են այցելել Հայաստանի և Ադրբեջանի նախագահների առաջիկա հանդիպումը կազմակերպելու համար»,- ասաց Դավիթ Բաբայանը' հավելելով, որ պաշտոնական Ստեփանակերտի դիրքորոշումը չի փոխվել, սկզբունքները' նույնպես:

«Մեր դիրքորոշումը մնացել է նույնը, մենք այն բազմիցս ներկայացրել ենք և այս անգամ էլ պաշտոնական Ստեփանակերտը կներկայացնի իր տեսակետերը: Բնականաբար, քննարկումների կենտրոնում կլինեն սահմանային միջադեպերը: Մենք մի շարք առաջարկություններ կներկայացնենք Մինսկի խմբի համանախագահներին: Մասնավորապես, այս տարի Բաքվում կայանալու է Եվրոպական խաղերը և այդ ժամանակ, ինչպես ընդունված է, բոլոր տեսակի հակամարտությունները պետք է սառեցվեն: Սա պետք է քննարկվի: Նաև մեր ուշադրության կենտրոնում է հարցը, որպեսզի մեխանիզմներ մշակվեն սահմանային մի ջադեպերի առնչությամբ հետաքննություն իրականացնելու համար: Այս հարցը մի քանի անգամ ներկայացվել է Մինկի խմբի համանախագահներին»,- ասաց Դավիթ Բաբայանը' հավելելով, որ համանախագահներն էլ են հասկանում և ընդունում այդ առաջարկությունը: Ըստ Բաբայանի՝ համանախագահներն այդ հարցը ներկայացրել են Ադրբեջանի իշխանություններին, սակայն պաշտոնական Բաքուն, ամենայն հավանականությամբ, այն մերժել է:

Հաջորդ շաբաթ ԵԱՀԿ Մինսկի խմբի համանախագահները կայցելեն տարածաշրջան: Փետրվարի 17-ին Հայաստանում համանախագահները կհանդիպեն ՀՀ նախագահ Սերժ Սարգսյանին, ԱԳ նախարար Էդվարդ Նալբանդյանին:

Լեռնային Ղարաբաղի հակամարտությունում միջնորդական առաքելություն իրականացնող Մինսկի խումբը վերջին օրերին Հելսինկիում էր: Ֆինլանդիան Մինսկի խմբի անդամ է, և միջնորդները ժամանել էին Հելսինկի խորհրդատվության համար: Այնուհետև նրանք մեկնել են Վիեննա: Համանախագահները Մյունխենում անվտանգության կոնֆերանսի շրջանակներում հանդիպել են ՀՀ արտաքին գործերի նախարար Էդվարդ Նալբանդյանի հետ: Նրանք, ինչպես այս, այնպես էլ ԵԱՀԿ գործող նախագահ, Սերբիայի ԱԳ նախարար Իվիցա Տադիչի հետ հանդիպումների արդյունքներով հայտարարություն էին տարածել: