ԵՏՄ-ին Ղրղզստանի անդամակցելու ընթացակարգերը կավարտվեն մինչև մայիսի 9-ը

Տարածաշրջան 17 Փետրվար, 2015 20:59

Ղրղզստանն ակնկալում է, որ Եվրասիական տնտեսական միությանը երկրի անդամակցության հետ կապված բոլոր ընթացակարգերը կավարտվեն մինչև այս տարվա մայիսի 9-ը, և հանրապետությունը կդառնա միավորման լիիրավ անդամ: Այդ մասին, ինչպես տեղեկացնում է «Արմենպրես»-ը, Sputnik գործակալությանը տված հարցազրույցում հայտարարել է Ղրղզստանի վարչապետ Ջոոմարտ Օթորբաևը:

«Ներկայում մենք դեռ աշխատում ենք երկու արձանագրությունների վրա, որոնք պայմանագիրը լրացնում են անցումային դրույթներով և կարևոր բաղադրիչների ճշգրտումներով: Մենք հուսով ենք, որ ԵՏՄ-ին երկրի անդամակցելու ընթացակարգերը կավարտվեն, և մինչև մայիսի 9-ը Ղրղզստանը կդառնա միավորման լիիրավ անդամ»,-ասել է նա:

Վարչապետի խոսքով՝ երկրի իշխանությունները, նախքան այդ քայլին գնալը, երեք տարի խորը հետազոտություններ են անցկացրել՝ պարզելու այն ռիսկերը, որոնք հնարավոր են ԵՏՄ-ին միանալու դեպքում:

«Բացասական երևույթներից հնարավոր է որոշակի գնաճային ճնշում, բայց, մեր կարծիքով, այն մեծ չի լինի: Անհամեմատ ավելի շատ են դրական գործոնները: Մեր հանրապետության արտադրողների համար 170-միլիոնանոց շուկայի բացումը արտահանման համար նախատեսված արտադրանքը հավաստագրելու հնարավորություն է»,-հավելել է Օթորբաևը: Նրա խոսքով՝ նման հնարավորությունները շատ կարևոր են գյուղատնտեսական արտադրողների համար:

«Նաև սպասվում է ներդրումային կլիմայի լուրջ բարելավում: Ուստի մենք այն կարծիքին ենք, որ էկոնոմիկայի համար, որը մենք կառուցում ենք, բնական տրամաբանական քայլ կլինի դրա բացումը մեր հիմնական գործընկեր երկրների համար»,-ասել է նա:

Ռուսաստանը, Բելառուսը և Ղազախստանը 2014 թվականի մայիսին Աստանայում պայմանագիր են ստորագրել ԵՏՄ-ի ստեղծման մասին, որն ուժի մեջ է մտել 2015 թվականի հունվարի 1-ին: Հունվարի 2-ին ԵՏՄ-ին միացել է Հայաստանը, մայիսին սպասվում է Ղրղզստանի միանալը: Ինչպես նշում է ՌԻԱ Նովոստին, ԵՏՄ-ի ստեղծումը նախկին Մաքսային միության մասնակից երկրներին, որոնց միագումար ՀՆԱ-ն կազմում է ԱՊՀ-ի համախառն արդյունքի 85 տոկոսը, հասցնում է ինտեգրացման ավելի բարձր մակարդակի: Այդպիսով, ավարտվում է ԱՊՀ-ի տարածքում խոշորագույն ընդհանուր շուկայի ձևավորումը, որը կվերածվի տնտեսական զարգացման նոր հզոր կենտրոնի: