ԵՏՄ-ի Մաքսային օրենսգիրքն ուժի մեջ կմտնի 2016 թվականի կեսերին

Եվրասիական տնտեսական միության Մաքսային օրենսգիրքն ուժի մեջ կմտնի 2016 թվականի կեսերին: Այդ մասին, ինչպես տեղեկացնում է «Արմենպրես»-ը, ՏԱՍՍ-ին հայտնել է Ուրալի մաքսային վարչության պետ Վյաչեսլավ Գոլոսկոկովը:

«Այս պահին Մաքսային օրենսգրքի նախագծի մշակումն ավարտված է, և այն գտնվում է ներպետական համաձայնեցման փուլում,- ասել է Գոլոսկոկովը, որը 2014 թվականին Համերկրային մաքսային ծառայության Ռիսկերի և օպերատիվ վերահսկողության վարչության պետի պաշտոնում մասնակցել է փաստաթղթի մշակմանը:- Մենք հուսով ենք, որ բոլոր ընթացակարգերի ավարտվելուց հետո Օրենսգիրքն ուժի մեջ կմտնի 2016 թվականի կեսերին: Մենք բոլորս կողմնորոշվում ենք այս ժամկետով»:

Գործակալության զրուցակիցն ընդգծել է, որ Հայաստանը՝ որպես Մաքսային միության նոր անդամ, և Ղրղզստանը, որը պլանավորում է անդամակցել դրան, «արդեն չեն կարող ազդեցություն գործել փաստաթղթի վրա»: «Հայաստանը և Ղրղզստանը միանում են արդեն գործող օենսդրությանը և չեն կարողանա սրբագրել Օրենսգիրքը: Այդ փաստաթուղթը մշակել են Մաքսային միության անդամները՝ Ռուսաստանը, Ղազախստանը և Բելառուսը»,- նշել է Գոլոսկոկովը:

Նրա խոսքով՝ փաստաթղթում ամրագրված են նոր մոտեցումներ մաքսային վերահսկողության նկատմամբ: Այսպես, օրինակ՝ փաստաթղթում գրանցված է մաքսային հայտարարագրի բացթողումը տեղեկատվական համակարգերի որոշման հիման վրա: «Այսինքն՝ կընթանա հայտարարագրերի ավտոմատ գրանցում: Նոր օրենսգրքի ընդունմամբ մենք պետք է լիովին անցնենք հայտարարագրերի էլեկտրոնային գրանցման: Այս գործընթացի ավտոմատացման հաշվին մաքսային հայտարարագրերի ստուգումն, իմ հաշվարկներով՝ 10 րոպեից ավելի չի տևի»,- ասել է Գոլոսկոկովը: