«ԵՄ-ն Հայաստանի հետ հեռանկարային հարաբերություններ է նախանշում». Տրայան Հրիսթեա

Հայաստանում ԵՄ պատվիրակության ղեկավար Տրայան Հրիսթեայի գնահատմամբ, տարին շատ կարեւոր է ՀՀ-ԵՄ հարաբերությունների տեսանկյունից, քանի որ մայիսին Ռիգայում կայանալիք ԱլԳ գագաթնաժողովին հստակեցվելու են համագործակցության շրջանակներն ու հնարավոր ապագան:

«Հատկապես կարեւոր են այդ բանակցությունների իրավական հիմքերը: ԵՄ-ն ակնկալիքով սպասում է այս աշխատանքների ավարտին եւ սկսել է աշխատել ՀՀ-ԵՄ բանակցություններ նոր համաձայնագրի շուրջ: ԵՄ-ն Հայաստանի հետ հեռանկարային հարաբերություններ է նախանշում: Այդ առնչությամբ կողմերն ունենք քաղաքական կամք»,- «Արմենպրես»-ի փոխանցմամբ, փետրվարի 25-ին «ԵՄ-Հայաստան համագործակցության հեռանկարները ներկայիս քաղաքական համատեքստում» գիտաժողովի ժամանակ ասաց դեսպանն` ընդգծելով, որ ԵՄ-ն կոնկրետ գաղափարներ է դրել գործընկեր յուրաքանչյուր պետության առջեւ:

«Չնայած Հայաստանի` ԵՏՄ-ին անդամակցության հանգամանքին, ԵՄ-ն հավատարիմ է շարունակել հարաբերությունները Հայաստանի հետ ԱլԳ շրջանակում եւ քննարկել համագործակցության ուղիներ, որոնք համահունչ են Հայաստանի նոր պարտավորություններին: Հայ գործընկերների հետ աշխատում ենք ԵՄ-ՀՀ հետագա համագործակցության շրջանակի վրա: Նպաստելու ենք որոշ ոլորտներում բարեփոխումների գործընթացների արագացմանը»,- ասաց Տրայան Հրիսթեան:

Խոսելով քաղաքացիական հասարակության մասին` դեսպանն ասաց, որ Եվրամիության նպատակն է խթանել քաղաքացիական հասարակության մասնակցությունը ԵՄ-ՀՀ երկկողմ հարաբերությունների հետագա ձեւավորման հարցում: «Գիտակցելով քաղաքացիական հասարակության կարեւորագույն դերը` ԵՄ-ն պատրաստակամ է խրախուսելու ակտիվ մասնակցություն ԱԼԳ հետագա օրակարգի ձեւավորման հարցում»,- եզրափակեց Հրիսթեան:

Հայաստանը բազմիցս հայտարարել է, որ ԵՏՄ-ի հետ ինտեգրացիոն քաղաքականությունը չի կարող ազդել Եվրամիության հետ համագործակցությանն ու ԱլԳ շրջանակում Եվրամիության ասոցացմանը: Հայաստանը Եվրամիությանը կներկայացնի այն ոլորտների եւ ծրագրերի փաթեթը, որոնք չեն խոչընդոտի համագործակցությանը ինտեգրացիոն նոր զարգացումների պարագայում: Հայաստանը 2015թ. հունվարի 2-ից ԵՏՄ լիիրավ անդամ է: