Հայաստանի քաղաքացիներին թույլատրեցին առանց գրանցման 30 օր գտնվել ՌԴ-ի տարածքում

Ռուսաստանի Դաշնության խորհուրդը փետրվարի 25-ի նիստում վավերացրել է այն համաձայնագիրը, որը Հայաստանի քաղաքացիներին թույլատրում է առանց գրանցման 30 օր գտնվել ՌԴ-ի տարածքում, տեղեկացնում է «Արմենպրես»-ը՝ հղում անելով «Ինտերֆաքս»-ին:

Հայաստանի տարածքում ռուսաստանցիների գտնվելու և Ռուսաստանի տարածքում Հայաստանի քաղաքացիների գտնվելու կարգի վերաբերյալ ՌԴ-ի կառավարության և Հայաստանի Հանրապետության կառավարության միջև համաձայնագիրն ստորագրվել է Սոչիում 2014 թվականի հուլիսի 11-ին:

Համաձայնագիրը նախատեսում է Հայաստանի Հանրապետության տարածքում ժամանակավորապես գտնվող ՌԴ-ի քաղաքացիներին և ՌԴ-ի տարածքում ժամանակվորապես գտնվող Հայաստանի Հանրապետության քաղաքացիներին ազատել 30 օրվա ընթացքում մուտքի պետության պատկան մարմիններում գրանցվելու պարտականությունից:

Ներկայում համանման մոտեցում է կիրառվում Բելառուսի Հանրապետության քաղաքացիների, ինչպես նաւե Ղազախստանի Հանրապետության քաղաքացիների նկատմամբ:

Համաձայնագրով տրամադրվող արտոնությունն ավելի լայն է Եվրասիական տնտեսական միության մասին 2014 թվականի մայիսի 29-ի պայմանագրով նախատեսվածից և իր գործողությունը տարածում է ՌԴ-ի տարածք ժամանած Հայաստանի Հանրապետության բոլոր քաղաքացիների վրա՝ անկախ մուտքի նպատակից: