Վրաստանի վարչապետին չի հետաքրքրում նախագահի հրավիրած արտահերթ նիստը

Վրաստանի վարչապետ Իրակլի Ղարիբաշվիլիին չի հետաքրքրում նախագահ Մարգվելաշվիլիի որոշմամբ երկրի տնտեսական իրադրության կապակցությամբ հանրապետության խորհրդարանի արտահերթ նիստի գումարումը: Այդ մասին, ինչպես տեղեկացնում է «Արմենպրես»-ը՝ հղում անելով «Նովոստի Գրուզիային», կառավարության ղեկավարը մարտի 11-ի ուշ երեկոյան լրագրողներին հայտարարել է Թբիլիսիում:

«Մեր ուշադրության կենտրոնում պետք է լինի բնակչությունը, մարդիկ: Մնացած ձևականություններն ինձ չեն հետաքրքրում: Մեզ համար գլխավորը գործելն է և ժողովրդի, մեր երկրի մասին մտածելը, միասնական լինելը՝ առանց որևէ շոուի»,- հայտարարել է Ղարիբաշվիլին:

Նախագահ Գեորգի Մարգվելաշվիլին մարտի 10-ին խորհրդարանական ընդդիմության հետ կոնսուլտացիաներից հետո, որն այժմ ներկայացնում են երկու կուսակցություն՝ «Միասնական ազգային շարժումը» և «Մեր Վրաստանը- ազատ դեմոկրատներ» կազմակերպությունը, երկրի տնտեսական իրադրության կապակցությամբ մարտի 13-ին նշանակել է խորհրդարանի արտահերթ նիստ:

Նիստի ամսաթվի նշանակումից հետո Վրաստանի խորհրդարանի նախագահ Դավիթ Ուսուպաշվիլին հայտարարել է, որ խորհրդարանական մեծամասնությունը «ճիշտ քաղաքական որոշում» կընդունի, եթե չներկայանա արտահերթ նիստին: Նրա խոսքով՝ ընդդիմության գործողությունները վնաս են հասցնում լարիի փոխարժեքին և հանրապետության տնտեսությանը: