Անկարան դժգոհում է Հայոց ցեղասպանության ճանաչման կոչ պարունակող ԵԽ զեկույցից

Պաշտոնական Անկարային դժգոհություն է պատճառել այն, որ Եվրախորհրդարանը մարդու իրավունքների և ժողովրդավարության վերաբերյալ տարեկան զեկույցում կոչ է արել ԵՄ անդամներին ճանաչել Հայոց ցեղասպանությունը: Ինչպես հաղորդում է «Արմենպրես»-ը' վկայակոչելով Թուրքիայի ԱԳՆ պաշտոնական կայքը, Թուրքիայի արտգործնախարարության խոսնակ Թանժու Բիլգիչն անդրադարձել է այս հարցին:

ԱԳՆ խոսնակը զեկույցում տեղ գտած արտահայտությունները «խնդրահարույց» է անվանել և նշել, որ իրենք խստորեն քննադատում են այն: Բիլգիչը կարծիք է հայտնել, որ նման քայլերը «լուրջ վնաս են հասցնում Թուրքիա-ԵՄ հարաբերություններին, ինչպես նաև բարդացնում են ապագայում հայերի և թուրքերի' սեփական ապագան միասին կառուցելու հնարավորությունը»:

Նա հիշեցրել է 1987 թվականին ԵԽ ընդունած «Հայկական հարցի քաղաքական լուծումը» խորագրով որոշումը' հավելելով, որ այստեղ ևս երևացել է կառույցի միակողմանի դիրքորոշումը: «Փորձը ցույց է տվել, որ նման քայլերը թուրք-հայկական բարեկամությանը չեն ծառայում»,- ասել է Բիլգիչը: Նա հայտնել է, որ իրենք ակնկալում են Եվրոպայի իրենց բարեկամներից «ավելի չխորացնել խնդիրը և դրա լուծմանն ուղղված կառուցողական քայլեր ձեռնարկել»:

Եվրախորհրդարանը մարտի 12-ին ընդունել է մարդու իրավունքների և ժողովրդավարության վերաբերյալ 2013 թվականի իր տարեկան զեկույցը: Փաստաթղթի որոշ պարբերություններ վերաբերում են Հայաստանին, մասնավորապես, հատվածը, որով այն «Հայոց ցեղասպանության 100-ամյա տարելիցին ընդառաջ կոչ է անում ԵՄ բոլոր անդամ պետություններին ընդունել Ցեղասպանությունը և խրախուսում ԵՄ ինստիտուտներին նպաստել Ցեղասպանության ճանաչմանը»: