Լեհաստանն անհանգստացած է ԼՂ հակամարտության գոտում իրավիճակի սրմամբ

Լեհաստանը մեծ անհանգստությամբ է հետևում ԼՂ հակամարտության գոտում լարվածության աճին և գտնում, որ միակ ճիշտ ձևաչափը, որ կարող է նպաստել խնդրի խաղաղ կարգավորմանը ԵԱՀԿ Մինսկի խումբն է: «Բոլոր հարցերը պետք է կարգավորվեն այդ խմբի շրջանակում և քաղաքական բոլոր գործիչները պետք է շահագրգիռ լինեն այս հարցում խաղաղ լուծում տալուն: Լեհ դիվանագետները ներգրավված են ԵԱՀԿ շրջանակներում, և ես կարծում եմ, որ Մինսկի խմբից առավել լավ ձևաչափ գոյություն չունի»,- «Արմենպրես»-ի հետ զրույցում ասաց Հայաստանում Լեհաստանի դեսպան Եժի Մարեկ Նովակովսկին:

Հարցին' չի՞ տեսնում արդյոք հակասություն այն առնչությամբ, որ Հայաստանն ու Մինսկի խմբի համանախագահները խոսում են մի լեզվով, իսկ Ադրբեջանը' մեկ այլ, դեսպանն ասաց. «Մեր խնդիրը չէ գնահատական տալ և դատավորի դերում հանդես գալ: Մեր խնդիրն է աջակցել, որ այդ ելքերը գտնվեն: Եթե հանդես գայի իմ երկրորդ մասնագիտությամբ' որպես լրագրող, ես գուցե իմ կարծիքը հնչեցնեի, սակայն այս պարագայում ես հայելու մյուս կողմից եմ հանդես գալիս' որպես դիվանագետ»,- ասաց դեսպանը:

Անդրադառնալով դիտարկմանը, որ խնդրի լուծման համար առաջին հերթին անհրաժեշտ է բանակցությունների սեղան վերադարձնել ԼՂՀ-ին՝ դեսպանն ասաց, որ ԵԱՀԿ Մինսկի խմբի պետությունները պետք է որոշեն' ինչ ձևաչափով պետք է ընթանան բանակցությունները:

«Այս կամ այն խորհուրդները կամ առաջարկները այս կամ այն դիվանագետների կողմից կարող են խանգարել խնդրի կարգավորմանը: Դիվանագետների խնդիրն այն է, որ լուռ գործեն, հնարավորության սահմաններում նրանց աշխատանքը քիչ լուսաբանվի ԶԼՄ-ներում: Անենք առավելագույնը, որ սանիտիմետր առ սանտիմետր առաջ ընթանանք: Մի շատ ճիշտ սկզբունք կա, որին հետևում են բժիշկները' անել առավելագույնը, որ չվնասենք»,- ասաց դեսպանը: