Ադրբեջանը շարունակում է ընդլայնել ԼՂՀ այցելողների իր ծիծաղելի «սև ցուցակը»

Ադրբեջանը շարունակում է Լեռնային Ղարաբաղի Հանրապետություն այցելող օտարեկրյա նշանավոր անձանց, պետական գործիչներին, լրագրողներին, քաղաքական գործիչներին «անցանկալի անձ» հայտարարել և նրանց անունները ներառել այսպես կոչված «սև ցուցակում»:

Ինչպես հաղորդում է «Արմենպրես»-ը, այս անգամ Ադրբեջանը մտադիր է իր այդ ծիծաղելի «սև ցուցակն» ընդլայնել մարտի 18-23-ին Երեւանում անցկացված «Արարատի ստորոտին» միջազգային մեդիա համաժողովին մասնակից 30 լրագրողներին ևս, ովքեր Հայոց ցեղասպանության 100-ամյա տարելիցի արարողությունների շրջանակում այցելել են ԼՂՀ:

Արտասահմանցի լրագրողները, որոնց թվում են եղել նաև ռումինական «Ադեվարուլ» թերթի լրագրող Ելենա Դումիտրին, ռուսաստանյան «Արգումենտը ի ֆակտի» թերթի լրագրող Ալեքսանդր Կոլեսնիչենկոն, «Չեխական ռադիո»-ի հաղորդավար Մոնիկա Խորսակովան, ԼՂՀ կատարած այցի շրջանակում հանդիպել են Արցախի Հանրապետության ղեկավարության հետ և այցելել մի շարք օբյեկտներ:

Ադրբեջանական APA լրատվական գործակալությունը հայտնում է, որ Ադրբեջանի արտաքին գործերի նախարարության խոսնակ Հիքմեթ Հաջիզադեն այդ առնչությամբ հայտարարել է, թե նրանց նկատմամբ «համապատասխան միջոցներ կձեռնարկվեն», ինչից ենթադրելի է, որ ադրբեջանական ԱԳՆ-ի «սև ցուցակը» կընդլայնվի ևս 30 արտասահմանցիների անուններով:

Ադրբեջանի ԱԳՆ-ի «սև ցուցակում» մինչ այժմ արդեն նշված են 350-ից ավելի անձինք, ովքեր, անկախ այն բանից, թե ինչպես է դրան վերաբերում Բաքուն, իրենց ցանկությամբ այցելել են ԼՂՀ: Նրանց մեծամասնությունը հայտարարել է, որ իրենց համար միևնույն է, թե արտասահմանցիների' ԼՂՀ այցի մասին ինչ են մտածում Բաքվում: