ՀԱՊԿ-ի կոմիտեն կքննարկի ՀՕՊ-ի և ՀՀՊ-ի միացյալ համակարգի ստեղծման գաղափարը

ՀԱՊԿ-ի ռազմական կոմիտեն ապրիլի 9-ին Տաջիկստանում կայանալիք նիստում կքննարկի հակաօդային պաշտպանության եւ հակահրթիռային պաշտպանության միացյալ համակարգի ստեղծման գաղափարը: Այդ մասին, ինչպես տեղեկացնում Է «Արմենպրես»-ը, հաղորդել Է Բելառուսի պաշտպանության նախարարությունը:

«Նիստի օրակարգով նախատեսված Է ՀԱՊԿ-ի ՀՕՊ-ի եւ ՀՀՊ-ի միացյալ համակարգի ստեղծման գաղափարի, ՀԱՊԿ-ի բազային ուսումնամեթոդական կազմակերպությունների գործունեության քննարկումը»,-նշվում Է հաղորդագրության մեջ:

Կազմակերպության մամուլի քարտուղար Վլադիմիր Զայնետդինովը նախօրյակին հայտնել Է, որ ռազմական կոմիտեի նիստում կվերլուծվեն հավաքական անվտանգության տարածաշրջաններում ռազմական անվտանգության մարտահրավերներն ու սպառնալիքները: Նիստը կկայանա ռազմական կոմիտեի նախագահ, Տաջիկստանի զինված ուժերի գլխավոր շտաբի պետ գեներալ-մայոր Զիրիֆի Թոհիրի Շարիֆզոդի ղեկավարությամբ: «Պլանավորվում Է վերլուծել հավաքական անվտանգության տարածաշրջաններում ռազմական անվտանգության մարտահրավերներն ու սպառնալիքները եւ մշակել դրանց հակազդման միջոցները, ինչպեÕ ½ նաեւ քննարկել ռազմական բաղադրիչի զարգացման հարցերը եւ ՀԱՊԿ-ի խաղաղապահ ուժերի զարգացման հեռանկարները»,-ճշտել Է Զայնետդինովը:

ՀԱՊԿ-ի կազմի մեջ մտնում են՝ Ռուսաստանը, Հայաստանը, Բելառուսը, Ղազախստանը, Ուզբեկստանը, Տաջիկստանը եւ Ղրղզստանը:

Քննարկվելու Է նաեւ 2015 թվականին օպերատիվ եւ մարտական պատրաստության համատեղ միջոցառումների անցկացման պլանը, ՀԱՊԿ-ի ձեւաչափով հակաօդային պաշտպանության կազմակերպումը, ինչպես նաեւ զինվորական կադրերի պատրաստման կատարելագործման հարցերը:

Ռազմական կոմիտեի այդ նիստը կկայանա ՀԱՊԿ-ի կանոնադրային մարմինների նիստի նախաշեմին, որը նշանակված Է 2015 թվականի մայիսին:

Ռազմական կոմիտեն ստեղծվել Է ՀԱՊԿ-ի անդամ պետությունների պաշտպանության նախարարների խորհրդին առընթեր, դրա կազմի մեջ մտնում են կազմակերպության անդամ պետությունների գլխավոր շտաբների պետերը եւ ՀԱՊԿ-ի միացյալ շտաբի պետը, հաղորդել Է ՌԻԱ Նովոստին: