Դավութօղլուն հայ-թուրքական հարաբերությունների կարգավորված չլինելու մեջ մեղադրել է «երրորդ կողմին»

Թուրքիայի վարչապետ Ահմեդ Դավութօղլուն, շարունակելով Հայոց ցեղասպանության ժխտողական մոտեցումը, այս անգամ էլ հայ-թուրքական հարաբերությունների կարգավորված չլինելու մեջ մեղադրել է «երրորդ կողմին»:

Ինչպես հաղորդում է «Արմենպրես»-ը' վկայակոչելով «Անատոլու» լրատվական գործակալությունը, թուրքական Kanal 24 հեռուստաալիքին տված հարցազրույցում Դավութօղլուն հայտարարել է, թե «երրորդ կողմերը շարունակաբար քրքրում են խնդիրը», և, իբր, այդ պատճառով է, որ հայ-թուրքական հարաբերությունները չեն կարգավորվում:

Չնշելով, որ հայ-թուրքական հարաբերությունների բարելավման մասին 2011 թվականին իր իսկ կողմից ստորագրված արձանագրությունները թուրքական կողմը չի վավերացրել անհիմն նախապայմաններ առաջադրելու պատճառով, Դավութօղլուն մեղադրանքներ է տեղացել նաև հայկական սփյուռքի հասցեին' հայտարարելով, թե «հայկական սփյուռքի ամբողջ խնդիրը թուրքերից վրեժ լուծելն է»:

Նա մեղադրել է հայկական կողմին այն բանում, թե հայերը անցյալ դարասկզբի իրադարձություններում միայն իրենց պատճառված ցավն են տեսնում' անտեսելով թուրքերի կրած ցավերն ու կորուստները:

«Սփյուռքին բավարարել հնարավոր չէ: Մեր կողմից կատարվող յուրաքանչյուր քայլ բավարար չեն համարում և ամեն ինչում թակարդ են տեսնում»,- ասել է նա:

Դավութօղլուն ասել է, որ եթե խնդիրը թողնեն հայերի և թուրքերի միջև լուծելուն, ապա այն «հանգիստ կերպով» կլուծվի: «Երրորդ կողմերը շարունակաբար քրքրում են հարցը: Հայկական սփյուռքի համար ամբողջ խնդիրը վրեժ լուծելն է: Այդ պատճառով էլ չեն ցանկանում, որ այս վերքը փակվի: Մենք կոչ ենք անում երրորդ կողմերին թողնել, որպեսզի հայերն ու թուրքերը միասին լուծեն խնդիրը և միասին հայտնագործեն սեփական աշխարհը»,- ասել է նա: