Վրաստանն Ադրբեջանից պահանջել է ձերբակալել և արտահանձնել Սաակաշվիլիին

Վրաստանի Գլխավոր դատախազությունն ապրիլի 28-ին դիմել է Ադրբեջանին՝ Վրաստանի պետության նախկին ղեկավար Միխեիլ Սաակաշվիլիի ձերբակալման և արտահանձնման պահանջով, տեղեկացնում է «Արմենպրես»-ը:

Սաակաշվիլին, որն Ուկրաինայի նախագահ Պյոտր Պորոշենկոյի արտահաստիքային խորհրդականն է, ապրիլի 28-ին ժամանել է Բաքու և մասնակցել Բաց հասարակությունների III գլոբալ համաժողովին:

«Մեր գերատեսչությունը երեկ դիմել է ադրբեջանական կողմին՝ Միխեիլ Սաակաշվիլիի ձերբակալման և հայրենիք հետագա արտահանձնման պահանջով»,- ապրիլի 29-ին «Նովոստի-Գրուզիային» հայտնել է Գլխավոր դատախազության հասարակայնության և զանգվածային լրատվամիջոցների հետ կապերի դեպարտամենտի ղեկավարի տեղակալ Նաթիա Սուխիաշվիլին:

Ըստ որում վրացական կողմն առայժմ պաշտոնական պատասխան չի ստացել Ադրբեջանից:

Վրաստանի Գլխավոր դատախազությունը 2014 թվականին հեռակա կարգով Սաակաշվիլիին մեղադրանքներ է առաջադրել մի քանի քրեական գործերով: Խոսքը վերաբերում է պետական միջոցներից անձնական կարիքների համար ավելի քան 8,8 միլիոն լարի ծախսելուն, 2007 թվականի նոյեմբերի 7-ին ակցիան ցրելու ընթացքում պաշտոնեական լիազորությունների վերազանցմանը, խորհրդարանի պատգամավոր Վալերի Գելաշվիլիին ծեծի ենթարկելուն և 2006 թվականին «Վրաստանի միացյալ բանկի» աշխատակից Սանդրո Գիրգվլիանի սպանությանը: