ԱԺ-ում քննարկում են հայ-վրացական Բարեկամության կամուրջ կառուցելու համաձայնագիրը

Հայաստանի խորհրդարանը քննարկում է հայ-վրացական սահմանի Սադախլո-Բագրատաշեն անցման կետի տարածքում նոր կամրջի կառուցման վերաբերյալ համաձայնագիրը: Համաձայնագիրը 2014թ.-ին Երևանում ստորագրվել է Հայաստանի և Վրաստանի կառավարությունների միջև:

Ըստ հիմնական զեկուցող, ՀՀ տրանսպորտի և կապի նախարարի տեղակալ Արթուր Առաքելյանի՝ 2013թ. Վերակառուցման և զարգացման եվրոպական բանկի և Հայաստանի միջև կնքվել է 10 միլիոն եվրոյի վարկային համաձայնագիր, որով նախատեսվում էր Դեբեդ գետի վրայով սահմանային կամրջի կառուցման ծրագիր իրականացնել: «Սակայն, քանի որ այնտեղ Հայաստանի և Վրաստանի սահմանը հստակ է, և կամրջի կեսը կառուցվելու էր Վրաստանի տարածքում, ապա վրացական կողմի հետ որոշակի համաձայնություններ ձեռք բերելու անհրաժեշտություն էր առաջացել, և մենք ծրագիրն իրագործելու համար բանակցություններ սկսեցինք: Կամրջի կառուցման ողջ ծախսերը պետք է հոգար հայկական կողմը, սակայն այստեղ հարց էր առաջացել, թե որ կողմը պետք է հանդիսանա սեփականատերն այդ կառույցի, քանի որ կամրջի մի մասը կառուցվելու էր Վրաստանի տարածքում: Մենք այդ հարցի շուրջ չէինք կարողանում պայմանավորվել, սակայն բանակցությունների արդյունքում մենք կարողացանք հասնել նրան, որ վրացական կողմը համաձայնեց համաֆինանսավորել ծրագիրը, ինչի արդյունքում մենք կծախսենք մեր վերցրած վարկի կեսից էլ մի փոքր պակաս գումար»,- «Արմենպրես»-ի հաղորդմամբ՝ նշեց փոխնախարարը:

Անդրադառնալով բուն համաձայնագրին՝ Արթուր Առաքելյանը հայտնեց, որ համաձայնագրում ամրագրված են մի քանի դրույթներ, որոնք իրականացնելի կդարձնեն այս ծրագիրը: «Առաջինը՝ պայմանավորվում ենք, որ յուրաքանչյուր կողմն իր տարածքում գտնվող հատվածը կառուցում է սեփական ներդրումներով: Պայմանավորվում ենք, որ շինարարի և նախագծողի ընտրությունը կկատարվի համատեղ ձևավորված հանձնաժողովի միջոցով: Պայմանավորվել ենք, որպեսզի ազատենք հարկերից այն նյութերի գծով գործարքները, որոնք կօգտագործվեն այս շինարարության ընթացքում»,- եզրափակեց փոխնախ արարը: