Հայաստանի և Իրանի հարաբերությունների զարգացման համար որևէ խոչընդոտ գոյություն չունի. Հասան Ռոհանի

Իրանում ՀՀ դեսպան Արտաշես Թումանյանը մայիսի 12-ին իր հավատարմագրերն է հանձնել Իրանի նախագահ Հասան Ռոհանիին: Ինչպես տեղեկացնում են ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, Նախագահ Ռոհանին գոհունակություն է հայտնել Հայաստանի և Իրանի միջև առկա բարեկամական և փոխշահավետ հարաբերություններից և նշել, որ երկու երկրների հարաբերությունների զարգացման համար որևէ խոչընդոտ գոյություն չունի, և որ տնտեսական, մշակութային ու քաղաքական ոլորտներում համագործակցության ընդլայնումը շահավետ է երկու երկրների համար: Իրանի նախագահը խնդրել է դեսպանին իր ջերմ ողջույնները փոխանցել ՀՀ նախագահ Սերժ Սարգսյանին:

Դեսպան Թումանյանը, նախագահ Ռոհանիին փոխանցելով ՀՀ նախագահ Սերժ Սարգսյանի ջերմ ողջույնները, հավաստիացրել է, որ ջանքեր չի խնայի Հայաստանի և Իրանի միջև հարաբերությունների առավել զարգացման ուղղությամբ, և ընդգծել է միջպետական նախագծերի կարևորությունը:

Իրանի նախագահը կարևորել է համատեղ նախագծերի իրականացման ուղղությամբ հետևողականության ցուցաբերումը և հավելել, որ Հայաստանը և Իրանը, բացի երկկողմ համագործակցությունից, լավագույնս փոխգործակցում են նաև միջազգային ասպարեզում: Նախագահ Ռոհանին բարձր է գնահատել Իրանի հայ համայնքի դերը և հավելել, որ երկու ժողովուրդների առավել սերտ փոխճանաչման համար անհրաժեշտ է ակտիվացնել շփումները' օգտվելով զբոսաշրջային կարողություններից, ինչպես նաև ակտիվացնել գիտական և համալսարանական փոխադարձ կապերը:

Հաջողություն մաղթելով ՀՀ դեսպանին իր գործունեության մեջ' Իրանի նախագահը հույս է հայտնել, որ նրա առաքելության ընթացքում երկկողմ հարաբերությունները բոլոր որլորտներում առավել կընդլայնվեն և կխորանան: