Հայաստանը և Սերբիան պատրաստվում են կնքել մուտքի արտոնագրի ռեժիմի վերացման պայմանագիր

Հայաստանի և Սերբիայի միջև համաձայնություն է ձեռք բերվել մուտքի արտոնագրերի ռեժիմի վերացման մասին պայմանագրի առնչությամբ: «Արմենպրես»-ի փոխանցմամբˋ հունիսի 3-ին Երևանում համատեղ ասուլիսում հայտարարեցին ԵԱՀԿ գործող նախագահ և Սերբիայի արտաքին գործերի նախարար Իվիցա Դաչիչը և ՀՀ արտաքին գործերի նախարար Էդվարդ Նալբանդյանը: «Հայաստանը բարեկամ երկիր է Սերբիայի համար: Մեն ք ցանկանում ենք զարգացնել երկկողմ համագործակացությունը և պատմական կապերը հայ և սերբ ժողովուրդների, ինչպես նաև մեր երկրների միջև: Մենք ցանկանում ենք, որ մեր երկկողմ հարաբերությունները զարգանան բոլոր ուղղություններով: Պետք է ուժեղացնել տնտեսական համագործակցությունը, որը փոքր ծավալների է հասնում: Մենք համաձայնեցինք ստորագրել վիազների ռեժիմի վերացման պայմանագիր, ինչը խոսում է երկկրողմ հարաբերությունների բարձր մակարդակի մասին»,- ասաց Սերբիայի արտաքին գործերի նախարարը: Իվիցա Դաչիչը կարևորեց նաև համագործակցությունը երկու ժողովուրդների սփյուռքների միջև:

ԵԱՀԿ գործող նախագահը հունիսի 3-ին պաշտոնական այցով ժամանել է Հայաստան: Այստեղ նա կհանդիպի նախագահ Սերժ Սարգսյանին, ՀՀ Ազգային Ժողովի նախագահ Գալուստ Սահակյանին, Լեռնային Ղարաբաղի Հանրապետության Նախագահ Բակո Սահակյանին, ինչպես նաև քաղաքական կուսակցությունների անդամներին, կայցելի նաև ԵԱՀԿ երևանյան գրասենյակ: Նախքան Հայաստան այցելելը Դաչիչը մայիսի 31-ին այցելել է Ադրբեջան, ապա Վրաստան: