Խոշոր ավտովթար՝ Գեղարքունիքի մարզում. «ՎԱԶ 2109»-ի վարորդը մահացել է, «ՈՒԱԶ»–ինը՝ տեղափոխվել հիվանդանոց (Թարմացված՝ ֆոտո)

Այսօր` նոյեմբերի 8-ին, խոշոր ավտովթար է տեղի ունեցել Գեղարքունիքի մարզում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, առավոտյան ժամը 09.00-ի սահմաններում Սևան-Մարտունի-Գետափ ավտոճանապարհի 52-րդ կմ-ին` Երանոս գյուղի սկզբնամասում, իրար են բախվել «ՎԱԶ 2109» մակնիշի 20 ԼՏ 032 համարանիշի, «ՈւԱԶ» բեռնատար մակնիշի 23 ՕՏ 035 համարանիշի և «Ֆոլցվագեն Ջետտա» մակնիշի 21 ԼՍ 588 համարանիշի ավտոմեքենաները:

Բախման հետևանքով «Ֆոլցվագենը» դուրս է եկել երթևեկելի գոտուց և համարյա հայտնվել ձորակում:

Վթարի հետևանքով «ՎԱԶ 2109»-ի վարորդը` Գեղարքունիքի մարզի Վարդենիս քաղաքի բնակիչ Արմեն Շաբոյանը, մահացել է, իսկ «ՈւԱԶ»-ի վարորդը` Տավուշի մարզի Թեղուտ գյուղի բնակիչ, 25-ամյա Նվեր Ղամբարյանը, տեղափոխվել է Դիլիջանի հիվանդանոց:

Դեպքի վայր էին ժամանել Ճանապարհային ոստիկանության 2-րդ սպայական գումարտակի 4-րդ վաշտի 1-ին դասակի աշխատակիցները` ավագ տեսուչ Հովսեփ Հարեյանի գլխավորությամբ:

Արդեն դեպքի վայր են ժամանել ոստիկանության քննչական գլխավոր վարչության Մարտունու քննչական բաժանմունքի քննիչները` ավագ քննիչ Թորգոմ Չանդոյանի գլխավորությամբ:

Ավագ քննիչի հանձնարարականով, ավտոմեքենաները տեղափոխվում են ոստիկանության Մարտունու բաժնի տուգանային հրապարակ:

Ոստիկանության Մարտունու բաժնի քննչական բաժանմունքում նյութեր են նախապատրաստվում:

Ֆոտոլրագրող Գագիկ Շամշյանը հայտնում է, որ նշված հատվածում ձնամաքրման աշխատանքներ չէին կատարվել, ավտոճանապարհը մոտ 30-40 սմ ծածկված էր ձյունով, սառցակալած էր, ինչն էլ վթարի հիմնական պատճառն էր դարձել: