Խոշոր ավտովթար Արագածոտնի մարզում. իրար են բախվել «Օպել-Վեկտրա»-ն և «Ֆորդ-Տրանզիտ»-ը՝ 2 հոգի մահացել է, կան վիրավորներ (ԹԱՐՄԱՑՎԱԾ՝ ՖՈՏՈ)

Այսօր՝ նոյեմբերի 14-ին, ավտովթար է տեղի ունեցել Արագածոտնի մարզում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, ժամը 18:30-ի սահմաններում Երևան-Վանաձոր ավտոճանապարհի Ծիլքար գյուղի սկզբնամասում իրար են բախվել «Օպել-Վեկտրա» մակնիշի 26 ՍԼ 206 համարանիշի և «Ֆորդ-Տրանզիտ» մակնիշի, 28 ՏՏ 801 համարանիշի ավտոմեքենաները:

Ըստ նախնական տվյալների՝ բախման հետևանքով կան վիրավորներ, որոնք տեղափոխվել են հիվանդանոց:

Արդեն դեպքի վայր են ժամանել Ճանապարհային ոստիկանության 2-րդ սպայական գումարտակի աշխատակիցները, ինչպես նաև Հայաստանի Արտակարգ իրավիճակների նախարարության Հայաստանի Փրկարար ծառայության Արագածոտնի մարզի փրկարարները:

Այս պահին դեպքի վայր են ժամանել նաև ոստիկանության քննչական գլխավոր վարչության Արագածոտնի քննչական բաժնի քննիչները, ովքեր փորձում են ճշտել վիրավորների ինքնությունը:

Ֆոտոլրագրողը հենց նոր  հայտնեց, որ «Օպել-Վեկտրա»-ից փրկարարները միայն հատուկ տեխնիկայի գործադրմամբ են կարողացել դուրս բերել երկու վիրավորներին և երկու մահացածների դիերը: Լուսանկարները` Գագիկ Շամշյանի: