Խոշոր ավտովթար Երևանում. «ԲՄՎ X5»–ը կիսվել է, կան վիրավորներ (ՖՈՏՈ)

Գագիկ Շամշյանը հայտնում է 16 Նոյեմբեր, 2011 8:25

Այսօր` նոյեմբերի 16-ին, ավտովթար է տեղի ունեցել Երևանում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, գիշերը` ժամը 00.15-ի սահմաններում, Արմավիրի մարզի Ծաղկունք գյուղի բնակիչ, Երևանի պետական ճարտարագիտական համալսարանի տրանսպորտային ֆակուլտետի օդային տրանսպորտի բաժնի 3-րդ կուրսի ուսանող, 22-ամյա Արամայիս Բաբայանը, վարելով իրեն պատկանող «ԲՄՎ X5» մակնիշի 15 ԼՕ 687 համարանիշի ավտոմեքենան, բախվել է Ծովակալ Իսակովի պողոտայի թիվ 203 էլեկտրական սյանը, որը գտնվում է ոստիկանության ներքին զորքերի զորամասի դիմաց:

Վթարի հետևանքով Արամայիս Բաբայանը և ուղևորներ` նույն գյուղի բնակիչ, 29-ամյա Վահագն Մանուկյանը, ով աշխատում է որպես ՀՀ արտարադատության նախարարության Դատական ակտերի հարկադիր կատարման ծառայության Արմավիրի մարզի հարկադիր կատարող, արդարադատության ավագ լեյտենանտ, և նույն գյուղի բնակիչ, 26-ամյա Էդիկ Մանուկյանը, ով աշխատում է ՀՀ առողջապահության նախարարության պետական ռեգիստրում որպես առաջատար մասնագետ, ստացել են մարմնական վնասվածքներ:

Ֆոտոլրագրող Գագիկ Շամշյանը հայտնում է, որ Վահագնը և Էդիկը եղբայրներ են, ովքեր մարմնական ծանր վնասվածքներով տեղափոխվել են «Արմենիա» հանրապետական բժշկական կենտրոն, իսկ վարորդ Ա.Բաբայանը տեղափոխվել է «Մալաթիա» բժշկական կենտրոն:

Դեպքի վայր էին ժամանել Երևանի ճանապարհային ոստիկանության մեծ թվով աշխատակիցներ:

Վթարի վայրում քննչական աշխատանքները ղեկավարում էր ոստիկանության քննչական գլխավոր վարչության Երևանի քննչական վարչության ճանապարհատրանսպորտային հանցագործությունների քննության բաժնի ավագ քննիչ Մանվել Մուրադյանը:

Ավագ քննիչի հանձնարարականով, ավտոմեքենան տեղափոխվեց Երևանի ՃՈ տուգանային հրապարակ:

Ֆոտոլրագրող Գագիկ Շամշյանը հայտնում է, որ ավտոմեքենան այնքան ուժգին էր հարվածել էլեկտրասյանը, որ էլեկտրասյունը հիմքից շուռ էր եկել, պոկվել էին էլեկտրալարերը, ինչպես նաև ավտոմեքենայի դիմացի հատվածը մնացել էր էլեկտրասյան մոտ, իսկ մնացած հատվածը մոտ 150-200 մետր շրջվել և սահել էր:

Վիրավորներին ավտոմեքենայից դուրս են բերել Արտակարգ իրավիճակների նախարարության Հայաստանի փրկարար ծառայության Երևանի փրկարարները, ովքեր օգտագործել են հատուկ տեխնիկա:

Լուսանկարները՝ Գագիկ Շամշյանի