ՀՅԴ-ի նախարարական պորտֆելները նույնն են մնացել. Արմեն Ռուստամյան (տեսանյութ)

Քիչ առաջ նախագահական նստավայրում ստորագրվեց ՀՀԿ-ՀՅԴ կոալիցիոն նոր համաձայնագիրը, որից հետո ՀՅԴ-ական Արմեն Ռուստամյանը armtimes.com-ի հետ զրույցում ասաց, որ նոր համագործակցությամբ կպահպանվեն ՀՅԴ-ին 2016-ին տրամադրված նախարարական երեք պորտֆելներն ու երկու մարզպետի պաշտոնը:

Բացի դրանից երկու կուսակցությունների համագործակցության աշխատակարգը նոր թափ կստանա եւ ՀՀՅ-ՀՅԴ քաղաքական խորհուրդը պարբերաբար նիստեր կգումարի որտեղ որոշումները կկայացվեն կոնսենսուսի միջոցով:

Արմեն Ռուստամյանի խոսքով' այս պահին ՀՅԴ-ն իրենց նախարարներին եւ մարզպետներին այլ ՀՅԴ-ականներով փոխարինելու մտադրություն չունի: ՀՀԿ-ի հետ քաղաքական համագործակցության այս նոր հուշագրով ավելի մեծ ուշադրություն կդարձվի կոռուպցիայի դեմ պայքարին, կադրային քաղաքականությանը եւ ընտրական գործընթացներին:

Հիշեցնենք, որ 2016 թվականի փետրվարի 24-ին ՀՀԿ-ն եւ ՀՅԴ-ն նախագահական նստավայրում ստորագրեցին քաղաքական համագործակցության հուշագիր, որով Դաշնակցությանը տրամադրվեց երեք նախարարական եւ երկու մարզպետի պաշտոն: Ներկայումս ՀՀ կրթության նախարարն է ՀՅԴ-ական Լեւոն Մկրտչյանը, տարածքային կառավարման նախարարը Դավիթ Լոքյանն է, բնապահպանության նախարարը Արծվիկ Մինասյանն է, իսկ Արագածոտնի մարզը ղեկավարում է ՀՅԴ-ական Գաբրիել Գյուզալյանը, Շիրակի մարզը՝ Հովսեփ Սիմոնյանը: